噚日，恒指一如所料向下插，裂口低開過千點，但喺低位就有買盤吸納，中午收市跌幅收窄至744點。網友鄙人見執番身彩好開心話：「本來諗住個市係咁跌，要上去IFC（全港最高大廈國際金融中心），𠵱家可以改去KFC（肯德基家鄉雞），港股低位反彈，可以食番餐慶祝。」
輸到冇眼睇
但佢似乎開心得太早嘞，下晝開市，恒指好快又掉頭再插，港股全日收報28373，又跌番千一點。Fei9966好慘咁話：「睇怕食完KFC，都要番返上去IFC。」Tfanman亦話：「可以食飽啲上路喇！」B仔奶粉仲話：「食完KFC，就去IFC，跟住『NoEyeSee』。」
唔知碇嘅潤潮插口問：「乜IFC頂樓開咗間KFC咩？
咁多人走去幫襯？不過就算冇都唔緊要，橫掂KFC可以叫外賣，買多過50蚊就有雞翼送。」咁都唔錯，喺IFC天台一路食雞翼，一路睇風景囉。