白韻琴自言投資幾千萬開設眼科醫院，為了促銷做宣傳，前晚一見記者即滔滔不絕，更借大劉劉鑾雄與李嘉欣的舊情過橋，踢爆大劉有千多度近視，多年前花17萬元到澳洲做激光矯視時，李嘉欣更陪伴在側。
健康快車前晚在文化中心舉行MusicalMoments籌款音樂會，吸引一班有心知音人，包括賭王何鴻燊女兒何超蕸、余錦遠陳家碧夫婦、黎小田和孫明揚等去到捧場。白韻琴與男友謝偉俊（Paul）各自入場，她一見記者就呻窮，表示每月開銷達百萬，她說：「我開咗間眼科醫院，投資咗幾千萬，淨係買間三千呎舖已經用咗2000萬，再用咗百幾萬裝修，儀器就最貴，使咗110萬美金（約852萬港元）。」
勸方逸華做手術
白姐姐滔滔不絕，問她有否做激光矯視，她即說：「我冇近視，十幾年前，我知方小姐（方逸華）有1000度近視，成日眼濛濛，邵叔叔（邵逸夫）一日睇六、七套劇，佢又睇唔到，又唔肯做激光，當時大劉（劉鑾雄）都有千幾度近視，佢就用咗17萬去咗澳洲做laser，嗰時仲叫埋李嘉欣陪佢，去做見證，大劉都有勸方小姐做㗎。」
問投資幾千萬，何時回本？白姐姐即說：「冇所謂啦，我喺美國投資房地產，買咗成條街都係30萬美金（約232萬港元），升過上100萬美金（約775萬港元），不過𠵱家又回落番，我問銀行借咗好多錢開舖，𠵱家窮過乞兒，因為乞兒係冇錢，但唔使同人借。」
此外，余錦遠與陳家碧放下兩個囡囡，二人世界拍拖聽音樂，余錦遠謂五歲及七歲的女兒最愛看《小飛俠》。
養女唔使400萬
余錦遠說：「佢哋𠵱家都有學唱歌、跳舞同畫畫，冇特別check係咪資優兒童，培育就一般啦，冇多冇少，但唔使400萬。」
採訪：MaggieLaw
攝影：ChenWaiOn
