噚日恒指急跌過千點，40隻藍籌股中，只有港交所（388）獨善其身，收市唔單止冇跌反而微升0.08%；其餘無一倖免全部跌，當中又以國企、工商同地產股跌幅最大，滙豐（005）跌咗5蚊，至於幾隻大孖沙旗艦股全部插水，長實（001）、新地（016）同新世界發展（017）跌4至5%。
獨港交所唔使跌
股價跌，揸住公司股份嘅大孖沙，賬面身家自然蒸發咗唔少，華華最鍾意同人計身家，冇得使都有得「恨」吓嘛！嗱，有金叵羅孫女旺住嘅「香港股神」李四叔，今年真係順心順意，噚日旗艦恒地（012）只係跌咗1.35銀，至於佢亦揸唔少嘅煤氣（003）更加只係跌0.34蚊，係咁易計吓，應該都係跌咗十零億左右；對於佢嚟講，私人擁有嘅兆基財經都賺過千億啦，賬面唔見嗰十零億，連碎銀都講唔上，頂盡都係神沙！所以華華都無謂同佢計喇。
郭氏三兄弟唔見60億
呢位李生今年大旺，另一位李生就斯人獨憔悴，以四大地產商嚟講，超人李嘉誠嘅長實（001），噚日無論以幅度定係金額計，都係跌得最甘嗰隻，跌咗7.2銀，跌幅達5.43%。以超人揸住嘅長實計，賬面身家蒸發咗66.7億銀（見表）。不過咁，首富話過：「不義而富且貴，於我如浮雲。」幾十億……浮雲啫，咪由佢飄過囉！
至於另一隻跌得都幾甘嘅地產股，就要數到新鴻基地產（016）嘞，跌咗5個半，郭氏三兄弟賬面身家唔見咗近60億銀，正所謂兄弟同心，其利斷金，一齊跌鑊甘。
至於股神李四叔老友，彤叔鄭裕彤就冇咁傷，新世界發展噚日收市跌咗1.3銀，彤叔賬面身家只係唔見咗約17億，又係碎銀啦！
電郵：mailto:[email protected]
