華裔小姐出身的楊秀惠,入行4年以來,令人印象最難忘的,莫過於一口令人摸不着頭腦的廣東話。近年她下苦功學廣東話,進步神速,在台慶劇《奸人堅》內還可以瞪着黃子華,一口氣以苦練多時的流利廣東話鬧臭對方,當場嚇得所有人目瞪口呆,有人還不禁擦一擦眼睛問:「佢係咪楊秀惠呀?」 第三回
楊秀惠向來不介意健康性感,經常流露儍氣又甜美的笑容,但入行初期,因廣東話不好令其事業發展受阻礙,不過楊秀惠並沒因此而氣餒,周遭的人不停嘴批評她,她也不停地訓練自己,由最初只可做一些滿口鄉音的土女角色,到4年後的今日,終於在《奸人堅》中扮演可以流利廣東話鬧人的凌玉碧。
越講越好加對白
楊秀惠說:「我呢個角色,係一個有自閉症嘅女仔,其實應該係講嘢唔多,都可能係咁,先搵我做,但係後來拍吓拍吓,導演發覺我廣東話好咗好多,加吓加吓就越嚟越多對白要講。記得有一場戲,話我發夢同子華一齊,仲生咗好多仔女,班仔女又嘈,我仲要指住佢係咁鬧,咁我就一輪嘴係咁鬧佢,一口氣鬧完,take咗兩次,導演就話OK,鬧完之後,連其他人都嚇親,仲問我點解平時講廣東話都冇咁正,鬧人嗰陣就咁鬼正。」
在《奸人堅》一劇中,楊秀惠經常要跟兩個戲路及工作態度截然不同的男、女主角做對手戲,自然獲益良多,她說:「我同子華、葉童對手戲最多,佢兩個真係完全唔同。子華佢變化好大,係一個幾好嘅挑戰,佢教我明白到劇本係死,人係活,佢會即興改好多嘢,好彩我又接得住,所以我覺得好好玩,我好鍾意。」
大讚葉童夠認真
楊秀惠續說:「至於葉童,佢真係一個好犀利嘅演員,佢會帶到我入戲,戲入面佢係做我家姐,佢真係會畀到我好家姐嘅感覺,好自然,令我好容易投入感情,同埋佢認真嘅工作態度,對我好有推動力。今次可以同佢哋兩個合作,真係學到好多嘢,好開心。」
今年兩套台慶劇《奸人堅》及《通天幹探》,楊秀惠都有份參演,近年不少劇迷喜在網上討論劇集演員的表現,楊秀惠是被批評的一個,其廣東話自然成為被批判的焦點,有人指她的廣東話仍然是聽不明,講不清,對此楊秀惠說:「其實兩套劇拍攝時間都唔同,《通天幹探》係兩年前拍,入面我係做一個警員,《奸人堅》係今年拍,我自己睇番都覺得《奸人堅》入面嘅我,廣東話進步咗好多。」
楊秀惠深明成功需苦幹的道理,所以過去4年她雖然沒有咬住酒塞讀報紙練習廣東話,但她會日日對着鏡子,一邊排戲一邊講廣東話。
學用丹田氣說話
楊秀惠說:「我知道喺香港做一個演員,廣東話係必須條件,就好似模特兒唔可以肥一樣,歌手唱歌一定要好聽一樣,我作為一個演員,演戲就要表達到我想講嘅嘢,觀眾接收唔到我就好失敗,我好明白呢個道理。
「呢幾年公司安排我上堂學廣東話,上堂之後我識得用丹田講對白,每日我就對住塊鏡大聲咁讀字,有戲開就對住塊鏡又或者搵朋友笨,睇我做戲,聽我講廣東話。到𠵱家我已經進步咗唔少,我知道有人覺得我廣東話仲係講得唔好,每個人睇法唔同,如果要話我係最好,最正音,嗰個我一定唔係,但係我覺得𠵱家自己講廣東話係可以接受,不過仲係有待進步。」
採訪:楊潔雯 攝影:陳慧安
服裝:GAS
化妝、髮型:MiuFungofBeautyTech
場地提供:ContinentalClub(GatewayHotel)
外勞小八卦:參選華姐 青春上位
現年23歲的楊秀惠,出生於馬來西亞,04年代表馬來西亞來港參加國際華裔小姐進入五強。加入無綫後憑青春劇集《赤沙印記@四葉草.2》彈出,即獲安排參演多套劇集如《酒店風雲》及《法證先鋒》等,但礙於廣東話發音不正故戲份不多。楊秀惠今次在《奸人堅》中扮演葉童妹妹凌玉碧,有多場內心戲,絕對是演技大考驗。