歐聯今朝凌晨重開，大家贏波贏到笑之餘，有冇留意好多球隊都有巴西球員？我求大俠初步統計，發現歐聯嘅巴西球員有98人，反而英格蘭球員得28人參與。
法國佔64人居次
「一個擁有98名巴西球員嘅聯賽，梗係世界上最好嘅聯賽！」AC米蘭球星卡卡講，又難怪佢咁招積，因為07年出外搵食嘅巴西球員有1,045人，就連以歐洲為舞台兼地位崇高嘅歐聯，亦難免被森巴足球染成金黃色！僅次於巴西係64人參賽嘅法國，餘下係意大利（55人）、西班牙（53人）、葡萄牙（41人）、德國（38人），有4支勁旅參賽嘅英格蘭就只得28人！
歐聯巴西球星氾濫亦令「有巴西球員肯定攞歐聯冠軍」嘅講法，變成「阿媽係女人」嘅廢話，因為太多球隊有巴西人助陣啦！國內聯賽方面，有215位巴西球員參與嘅葡超，成為巴西球員最大入口國，第二竟然係日職聯（57名），證明日本人的確有眼光。
巴西球星固然好波，不過亦有唔少麻煩嘢。好似羅賓奴上周國際賽後喺巴西夜蒲，同行有巴廸斯達同巴塞嘅朗拿甸奴。據講羅賓奴同一位金髮美女攬埋一嚿，仲問保安攞咗40個避孕套，結果周一被球會罰款15,000歐元（約16萬港元）！
羅賓奴細哨難管教
所以，點樣管治巴西人就好緊要，巴塞就偏偏唔學皇馬咁打手板，會長拉樸達仲維護朗拿甸奴：「大家應該尊重佢嘅私生活！」咁都得？唔怪得巴塞今季表現咁差啦！