成功嫁入豪門嘅30歲韓國女星金喜善，上星期五喺首爾華克山莊舉行千萬婚禮，噚日上晝，金喜善更新咗個人網站cyworld，同fans分享新婚喜悅，大晒幸福。
金喜善上星期五同拍拖8個月嘅34歲富商男友朴駐英結婚，但就謝絕傳媒採訪。喺網站內，金喜善以「大家好 師奶來了」為題，向專程到婚禮現場守候嘅記者同fans道歉，佢話：「當日不公開婚禮，請大家諒解，稍後我會上載更多相片。」佢果然守承諾，之後上載咗婚禮當日，同女星崔真實同宋允兒嘅合照。
網站一度癱瘓
金喜善話好感激fans送畀佢嘅新婚禮物，又自爆由於當日天氣太凍，搞到冷傷風。網誌仲鋪滿大大小小嘅粉紅色心心，認真甜到漏，但阿Deep就睇到有啲毛管戙。除此之外，噚日下晝有大批網友爭住上金喜善嘅網站，想留言恭喜佢，點知搞到網站負荷唔住，一度癱瘓。
金喜善個人網頁網址： http://ww.cyworld.com/kimheeseon
版主：網盜王尊尼Deep
本欄逢周一至五刊出