近來賽馬投注額，不斷反彈，例如上星期嘅投注額就超過十億元，其真正原因不明。靠估之下，可能有兩個理由，第一個就係股市暢旺，賺大錢之股民、炒家不計其數。佢哋喺最大嘅賭場（港交所之每日窩輪成交額竟然有三四百億元，唔係賭，算係乜？）贏咗，到一個小賭場（馬場一季投注額只得六百幾億元）玩大啲，唔算稀奇吖。第二個理由會係北水南調，內地人來港賭馬，肯定大手筆過我哋。
九七前投注額上升，馬會笑騎騎，現在投注額自谷底反彈，馬會要付出代價，就係不時有啲內地人在會員廂房嘈喧巴閉，冇喼頓敢勸阻佢哋。上星期日，馬場老師傅卜咗一張八人大枱請客，佢話係內地來客喎。點知老師傅由十二點半坐到三點，仍然唔見客人到，佢又唔好意思先食飯。繼續苦等，卒之等到第六場先至叫一碟豉油雞，一碗白飯填肚。食完，一位講普通話，帶有濃重香港口音嘅男子帶幾位男女駕到，老師傅表達歡迎之意，嗰位香港口音男子旁若無人，用普通話大大聲咁介紹何謂獨贏，何謂三重彩，嘈到成個會員廂房都聽見，廂房內眾人為之側目。老師傅可能唔好意思，未到第九場，自己埋單，告辭先走咯！左丁山俾佢哋嘈到冇晒集中力，第七場後連場大敗，為之氣結，如果再有下一次，見到內地同胞與香港帶街說話如此大聲，會考慮去搵監場董事投訴之。
宏觀啲睇，香港股市已經Ａ股化，投資道理敵不過投機熱錢，香港人唯有跟風。江澤民雖然講過河水不犯井水，井水不犯河水，但香港畢竟係一口井而已，有黃河長江北水殺到，口井一定會被河水注滿，清水都變成黃泥水啦。河水全面氾濫香江嘅話，乜嘢社交禮貌，基本禮儀都受北水染黃，豈獨係馬場會員廂房吖。
特區政府高層成日話香港要做世界大都會，不止是中國一個大城市。幾年前都可以講得咁清高嘅，𠵱家香港人睇錢份上渴望北水南調，歡迎港股直通車，乖乖地做一個中國大城市啦，俗語話，跪地餵豬乸呀！