呢期最熱嘅新股，唔使諗首推加價招股、上限PE去到106倍嘅阿里巴巴（1688）。嗱，乜嘢抽阿里巴巴全攻略、阿里巴巴暗盤價升幾多？sorry，請你揭前幾頁慢慢睇，喺華華地盤，梗係畀啲更堅嘅料大家。
阿里巴巴抽唔抽得過，淨睇公司經營情況、保薦人往績、同類股份PE股價……都未夠全面，華華問埋堪輿學家，阿里巴巴主席馬雲嘅面相，睇吓佢係咪淡定有錢剩兼益埋街坊。仲有，既然佢係嚟自「網上」，點可以忽略網友嘅評論先。咁都未夠，起埋馬雲底，連佢講過乜都摷埋畀你睇，抵錫嘞啩！
堪輿學家：馬雲有發達相
堪輿學家吳佩孚同華華講，馬雲（圖）係有發達相，但衰在冇福氣命。佢頭大額廣、眉短眼有神，係有橫財命，一副賭仔相；不過，面削、骨外露，發達後都會大上大落，聚唔到財。吳師傅話一副有福氣嘅相，一定要圓口圓面，千祈唔好見骨，顴骨同面骨都唔可以削。
另一堪輿學家簫鎮昇就話，馬雲面相屬於三清局，頭髮、眉毛同鬚都較稀疏，呢類人容易行運；加上眉靈骨突起，眼眉毛生正喺眉靈骨位置，容易遇到貴人。而且佢「顴骨插天倉」，有「英雄力壓萬人」命，仲有「下巴兜兜，晚景無憂」；不過面珠冇肉，注定天生奔波勞碌。
整體而言，面相冇大問題，嚟緊應該仲有運行。阿里巴巴以百倍PE招股，都吸引到大孖沙同散戶爭住認購，國際配售反應熱到要提早截飛，梗有運行啦，差在會唔會帶挈埋一眾撐佢嘅散戶啫。
出年犯太歲 宜短炒
講到呢度，華華最想知道從馬雲面相嚟睇，阿里巴巴究竟認唔認購得過？吳佩孚就指點迷津：「由於佢姓馬，出年鼠年會犯太歲，所以買佢公司都係只適宜短炒，唔好長揸。」簫鎮昇就話：「老闆有運行，公司唔會差，不過馬喺鼠年犯太歲，公司出年都會較為波動。」
電郵：mailto:[email protected]
批評：網友力數七宗罪
雖然阿里巴巴國際配售反應好到要提早截飛，但散戶繼續喺網上討論區力數其不是，tokyowalker就列出阿里巴巴七宗罪：
1.估價太高──係斷估個估；
2.舊貨太多；
3.寸。好嘅就話你有前瞻，寸得起；唔好就係寸過頭，乞人憎；
4.招股兩度提價；
5.大話連篇，令可信性大大降低；
6.06年派股息，派到公司蝕幾億，將07年預測盈利都派埋先上市；
7.真正股東係網上廣告公司如Yahoo、MSN等，預期未來廣告開支勁大。
所以佢勸其他網友用現金抽一手玩吓就算。查實討論區上有近八成半網友都話：「馬雲嘅火棒，你接埋我嗰份」。Etkin就一句到尾話：「阿里巴巴四十大盜。」
怕接火棒
咁肯接呢支火棒嘅一成半人當中，最落力嘅應該係mouseali，「第一日保守估計見18蚊（招股上限價13.5元），唔抽你哋笨，間公司引入基礎投資者AIG、九倉（004）吳光正、工銀亞洲（349）同郭氏兄弟等，有乜可能全部做儍仔俾人『昆』？」唔少散戶都係勇字當頭。
勁寸：主席豪語錄
‧「錯過咗Google嘅投資者，唔可以再錯過阿里巴巴嘅發展。」（10月22日）
‧「過去好多公司變咗大公司，大公司最終演變成爛公司，死因往往出自制度僵化，尤其網絡時代，欠缺彈性嘅『大象』（巨企），肯定會輸畀合力搬走『大象』嘅『小螞蟻』（小商家），除非大象識跳舞，但識跳舞嘅大象好少見。」（9月16日）
‧「出嚟社會第一日，我就同自己講唔要為錢工作，所以錢一直冇影響我，我都冇被錢影響過。唔好問我身家幾多，我連自己工資幾多都唔知。」（9月10日）
‧「自小就覺得跟人哋唔同，你睇我生得咁怪，冇樣貌、高度、名望同金錢，要人家respect、鍾意我，注定要付上常人唔願付出嘅沉重代價！」
‧「你見過有人拎住放大鏡喺身上搵癌症未？儍仔先會有時間搵競爭對手，同佢鬥我唔係crazy，係stupid！」
‧「我從來唔明乜嘢叫成功，只知何謂失敗。𠵱家嘅我成功咩？我先唔要呢種成功。人要忘記成功，一個enjoysuccess嘅CEO，估計不出3年就出問題。」
馬雲簡歷
年齡：43歲
工作
‧1988-1995年：杭州電子工學院英文及國際貿易講師
‧1995-1997年：創立中國黃頁
‧1998-1999年：負責外經貿部中國國際電子商務中心
‧1999至今年：成立阿里巴巴，出任公司主席及首席執行官
榮譽
‧2001年：世界經濟論壇選為「年青的全球領袖」
‧2005年：財富雜誌評為「亞洲最具影響力的25大商人」