阿里巴巴（1688）今日正式公開發售，市場反應有幾熱烈，睇睇噚日記者會有過百名記者出席就估到，除咗本地傳媒，仲有唔少嚟自大陸甚至日本嘅媒體。
記者會舉行時間係黃昏6點，主要係就番身在紐約嘅公司管理層，因為美國時間係早上6點，主席馬雲喺視像會議上都話，佢好似仲瞓緊覺。通常公司上市前做路演都會好辛苦，因為要不停見機構投資者，解釋間公司，等佢哋畀面支持吓，阿里巴巴10月15號開始路演，馬雲話實情唔係咁辛苦，反而覺得呢個星期係咁多年嚟最輕鬆，因為大家準備工夫做得好，佢每日淨係負責講十分鐘嘢，仲有好多時間可以思考其他問題，甚至騰出時間打吓波、睇吓戲同參觀展覽館㖭。
雖然話認購反應好，但首席執行官衛哲喺記者會上都要為公司賣吓廣告，佢話阿里巴巴嘅使命係「讓天下沒有難做的生意」，仲數晒公司六大價值觀：「激情、誠信、敬業、團隊合作、擁抱變化、同客戶第一」。誇張？未算，你都未聽埋佢硬銷公司嘅口號，「投資阿里巴巴，就係投資高增長、高利潤率、高現金流嘅公司，就係投資中國經濟最活躍嘅中小企市場，最有前景嘅互聯網市場。」服未！