靚女未必全部都係人見人愛，車見車載，日本網民最近搞咗個「最令人火滾靚女」選舉，近日被踢爆有新歡嘅日本女歌手濱崎步打入五大，「黑面女王」澤尻英龍華就眾望所歸榮登榜首。
寸步姐扮女王
排名第五嘅步姐雖然深受香港fans力撐，但佢喺日本人氣低迷已經係不爭事實，日本網友kiki毫不客氣咁話步姐：「冇人氣嘅步姐經常扮女王，令人討厭。」第四位係過氣麻甩尤物藤原紀香，佢被網友批評談吐舉止過份造作。日本富婆叶姊妹憑住一副人工誇張身材同外貌，被網友踢入三甲之內。至於經常現身綜藝節目、講嘢囂張嘅女醫生西川史子，就被網民選為亞軍。
冠軍囉喎，就非澤尻英龍華莫屬，佢上月尾宣傳新片《ClosedNote》時黑面兼臭寸，引起全國憤怒，眾望所歸成為冠軍。網友良子話：「澤尻雖然生得靚，可惜做人冇品。」
網址： http://kireaji.net/blog/bijin201007.html
版主：網盜王尊尼Deep
本欄逢周一至五刊出