倪匡噚日去亞視總台，做劉天賜同陶傑主持嘅《斑馬在線》節目嘉賓。有啲發福嘅倪匡自爆五花腩係佢恩人，越肥越鍾意食，搞到成日俾老婆鬧；佢仲話：「肥姐60歲，我72仲怕乜，賺咗12年啦。」
更年期飲酒飲壞腦
陶傑踢爆倪匡30年前食過大麻又諗過跳樓，倪匡笑住話嗰時更年期飲酒飲壞腦，咪食大麻，跳樓又係飲大咗貪玩。佢話，古今中外好多大作家都自殺，後尾佢問劉家良師傅做特技跳樓時係乜感覺，對方話跳好耐都未到底，佢即刻縮沙，𠵱家嘅佢更絕對唔贊成人自殺。不過，倪匡對死亡好豁達，認為死既然係必然嘅就唔需要驚，所以佢出席喪禮時，成日哈哈大笑，搞到俾人趕出靈堂。
另外，之前無綫高層陳志雲話《斑》好悶，陶傑話香港有言論自由，不過佢唔明點解要喺鞋底舔奶油，似乎矛頭直指無綫嘅《味分高下》。