香港演藝界個個要返大陸搵人仔，叫佢哋講句阿爺唔鍾意聽嘅說話都幾難，何況係中央一直睇唔順眼嘅2012年雙普選？但有一位仁兄就唔同喇，佢噚日居然夠膽現身民主黨搞嘅「唱好2012普選BandShow」，大唱首本名曲，仲不惜袒胸跳勁舞撐民主㖭。呢個人咪就係新一代民主歌神、「白花油王子」顏福偉囉。
出錢出力撐雙普選
個騷係由民主黨青年委員會同民主動力等團體一齊搞嘅，有少女跳hip-hop、又有後生仔打band表演音樂。但最具人氣嘅演出嘉賓，就要數顏福偉喇。佢着住件粉紅色緊身運動衫，仲將拉鏈拉低啲，無懼天氣凉咗秋風大咗，照樣打出個心口，表演佢嘅首本名曲《愛多八十年》。福仔呢首歌嘅MV唔少人睇過，都覺得佢極具個人風格，加埋啲舞步就更突出，結果贏到現場唔少阿伯同fans捧場。
唔好以為白花油王子係忽然民主一族，今年7.1佢就好低調咁參加咗遊行，同幾萬市民一齊爭取2012年雙普選，現場仲有白花油派㖭呀。早排緬甸軍政府鎮壓當地僧侶發起嘅遊行，感性嘅福仔又喊咗出嚟，仲話要參加燭光晚會。
所以今次顏福偉聽到民主黨有個支持普選嘅bandshow，就即時答應參加。佢噚日除咗大跳大唱《愛多八十年》，仲唱埋《快樂不快樂》，在場嗰百幾位觀眾紛紛大叫encore，民主歌神亦徇眾要求，即場再送多支曲畀現場觀眾高興高興。
同類活動來者不拒
百忙中抽空獻唱嘅福仔話，自己一直好支持2012年雙普選，用呢啲市民有興趣嘅活動嚟推動雙普選就最好不過，佢仲話日後有同類活動都來者不拒。八方聽聞，個show係專登遷就福仔個檔期，延至噚日先舉行㗎。負責人民主黨林子健話，顏福偉一向支持普選，有呢啲show，表演嘉賓非佢莫屬，但個人當然最想香港普選唔使好似首歌咁「等多80年」啦。
八方覺得，如果香港真係從速落實到普選，香港人聽多幾次《愛多八十年》又點話吖。