周末周日本來係輕輕鬆鬆嘅日子，但呢兩日八方撞親啲朋友，佢哋都好似坐唔安食唔落咁，唔使講都係因為擔心緊今日開市，股市會唔會跟隨美市大跌啦。人人都昅實個市，好似上個禮拜浸大學生「少年股神」盧其釗用七萬蚊買股票一年半間賺到350萬嘅報道出街後，唔少讀者同股民都好感興趣，同時亦有人質疑佢係咪真係咁醒。
想做番個平凡大學生
八方本住求真精神，就讀者嘅疑問查探究竟，原來少年股神話，佢買股票時唔係一下子入晒十萬貨咁多，只係當日篇幅所限，難以一一交代佢入貨嘅詳細過程啫。少年股神仲話，報道寫嘅只係佢賺得最多嘅股票而已。八方想再問佢仲入咗啲乜嘢貨，佢就似乎唔想再多講，話希望低調啲，做番個平凡嘅大學生喎。
網絡狂徒叫佢小心啲
八方起初唔明點解少年股神咁驚青，後來上網先發現有網民唔妥佢，話佢晒命，叫佢出入小心啲喎。呢個時勢，原來唔只炒股容易失去理性，連聽到人哋買股票賺大錢，都隨時會眼紅人至失去理性。小心！小心！