家陣港股位高勢危，散戶除咗搵黃大仙指點迷津，最實際就梗係搵專家。至於一眾股壇名嘴雖然時不時都會出席吓講座，為散戶解答疑難，不過，講座閒閒哋招呼幾百人，想近距離埋身問多兩句都幾難。
華華前排睇報紙，見到豐盛金融董事黃國英搞投資飯局嘅廣告，佢同啲散戶粉絲食餐飯兼幫佢哋睇睇個投資組合，每位收五百零蚊，抵唔抵視乎你聽完佢高見之後，喺股市賺得番幾多。
初時冇街外客
其實呢個飯局都搞咗幾次，黃國英好老實同華華講，去免費講座嘅客，唔係佢哋嘅目標客；而收錢陪食飯傾偈呢個咁Sharp嘅Idea，亦唔係佢諗嘅，皆因之前有傳媒搵佢合作，用飯局形式搞過一次，佢覺得幾好，之後就將人哋條橋翻炒，但主辦人就變咗自己間公司，開頭嗰陣主要係招呼熟客，求其收番成本價，街外生客就成本加多五嚿水，結果一個街外客都冇！
不過，隨着股市係咁升，啲人又賺到錢，就唔會孤寒嗰幾百蚊，加上每次都係3至5圍，有多啲時間傾耐啲，所以近幾次都好快爆滿！黃國英話：「每圍都會陪坐廿零分鐘，食幾道菜，啲菜式同去飲差唔多，畀錢嚟得飯局嘅，淨問冧巴嘅真係唔多，好多時傾傾吓，係人哋畀番個冧巴我」，佢仲有啲客搞4次嚟3次，連佢都覺得多咗啲。