股災20周年有「紀念」活動，美股上周五大跌360多點，港股今日勢難倖免，預佢會跌500至1000點。
恒指上到30000點大關，8月17日低位係19387，短短兩個月內，上升超過10000點，升勢之急，升幅之大，震撼人心，咁升法，調整必然，只差遲早。
股災會否重臨，個人認為可能性不大。港股調整，消化一下累積的大升幅，係正常嘅，亦不宜看得太淡。
外圍股市升跌無疑對港股有扯動作用，但今時唔同往日，港股水浸眼眉，跟外圍下跌，唔會跌得好多，回番十零個巴仙，唞一唞，又會再升過。
上市公司轉型，已成為大趨勢，其實，本港股市亦一直高調地轉型，由「本港化」、「外資化」而變成「中國化」，唔單止上市公司「中國化」（現時內地公司已佔港股逾半市值，仲一路上升中），甚至買家同揸家中，中資所佔的比例亦越來越大，佢哋真金白銀大手大手咁買，唔少「自己友」嘅股票，已俾佢哋收亁。
外資睇淡 中資睇好
港股大升後風險肯定越來越大，外資公開唱淡，好正常，佢哋呢兩三個月，係咁減磅，唔沽晒都起碼七八成。至於香港股民，好多都趁升市一路「骨水」，家吓亦好輕身。但係諗深一層，好似美國鋁業沽中國鋁業（2600），股神畢菲特沽中石油（857），以百億元計嘅貨，俾邊班人食咗呢？
目前嘅大形勢係，外資睇淡，中資睇好，港人冇乜貨，大量資金追逐有限嘅貨源，後市會點？
中石油交行趁低買
港股轉中國化，外資影響力將會逐步減弱，中資亦可逐步控制大局。當然，形勢的完全改觀，不會係一兩年間嘅事，但三五七年後，中資好大機會可取得「話事權」。其實，中央已小試牛刀，突如其來，宣佈港股直通車消息，令全力造淡的外資，吃了一記悶棍。
直通車何時開動，中央唔係在拖，而係等緊一個最佳時機，話唔定港股調整後，就會宣佈。
中資一路買開嘅，係國壽（2628）、中石油同中石化（386）等，近期新貴係紫金（2899）、中國動向（3813）同交通銀行（3328），可趁低吸納。