周潤發昨日到天水圍出席「世界濕地日2008香港區慶祝活動啓動禮」，一向關心社區的發哥希望政府除關注生態環境外，也要關注跟濕地公園一街之隔的天水圍，因為現時該區正處於水深火熱中。不過發哥表明無意從政，他笑說：「我儍儍哋，咁咪癲埋！唉，唔好喇，我都冇食力。」
周潤發昨日以香港濕地保育大使身份，到天水圍出席「世界濕地日2008香港區慶祝活動啓動禮」，漁農自然護理署長張少卿更在現場向發哥頒發委任狀，而發嫂陳薈蓮也有陪同出席。
呼籲市民減少駕車
天水圍近日再發生倫理慘劇，發哥對此甚為感觸，他在台上說：「特首建設和諧社會，濕地公園、海洋生態及空氣調節都好重要，但天水圍同濕地公園只係一街之隔，大家都知發生乜事，政府用好多資源嚟保護生態，但隔籬嘅生態同和諧生活都好令人擔心，可能政府用數百萬去保護黑皮鷺啦；要有和諧社會環境，就要同大自然接觸，紓緩感情，希望每個天水圍家庭成員都可以好好入嚟去濕地公園感受吓。」發哥指政府除了要保護大自然外，還要關注社區民生。
另一方面，發哥呼籲市民到郊野公園記緊將垃圾放入垃圾桶，他還希望發起大家不要駕車一天，他笑說：「香港人如果有潔癖，好似張學友太太就好，亁淨到不得了。」發哥笑言要為天水圍改名，他說：「出面三萬點，天水圍都水深火熱三萬點，呢度環境好好，但嗰度就死人冧樓，唔好囉。」
記者問發哥應做甚麼事去關注天水圍，他說：「第一件事電話要有人聽，政府話要扶貧深水埗，呢度都要，要增加多啲託兒所、青少年中心，社工多兩、三倍，同發放雙程證，讓家庭嘅內地成員來港照顧小朋友。天水圍最大問題係人本身嘅思維，最緊要搞掂本身，父母有問題會影響下一代。」
自言未夠資格做官
發哥如此關心社會，可有考慮從政？他聞言說：「我從政？我儍儍哋，咁咪癲埋！唉，唔好喇，我都冇食力，做副處長又唔得，又冇學歷。」他指天水圍與濕地公園恍如兩個世界，天水圍雖然也有高材生，不過他認為首要任務是：「搵蔡伯勵幫天水圍改名轉運。」
此外，發哥好友李安的《色，戒》無緣角逐奧斯卡最佳外語片，對此他說：「唞吓啦，使乜攞啫，都咁多喇，畀佢唞唞，我絕對贊成畀佢唞唞，每樣嘢都要平衡，佢唔志在攞唔攞獎，以我認識嘅佢唔係咁嘅人，唔係為攞獎而拍戲。」
採訪：魯萍
攝影：陳俊強
親民小八卦：小學生冧掂發哥發嫂
周潤發昨日在現場與天水圍的學生進行真情對話，其中一名小學生問發哥不拍戲想做甚麼時，發哥說：「做雀囉，有蝦有蟹食，唔使俾人槍殺，打死我都唔做演員，要做黑皮鷺。」由於該名小學生身形肥嘟嘟，十分可愛，活動完畢後發嫂也上前跟他合照。
