港台近年頻頻傳出醜聞，由廣播處處長朱培慶到DJ拿拿淋，到前日高層張文新又涉嫌酒後駕車，出事人物不限階層級別，令到一眾撐港台之友陷於極度迷惘，唔知點樣撐落去，最高興者莫過於一直認為港台「食碗面反碗底」仲想摺埋港台嘅煲呔政府同阿爺。港台噚日使出奇招，下午喺節目中突然播出一首祖國嘅革命歌《沒有共產黨就沒有新中國》，實行向阿爺靠攏，大有博阿爺歡心藉此「放港台一條生路」嘅意味。
香港人或者好多都唔知有隻咁hardsell共產黨嘅歌，查實《沒有共產黨就沒有新中國》喺四十年代由一名19歲嘅中共黨員曹火星創作，用嚟歌頌共產黨，起初只叫《沒有共產黨就沒有中國》，後來毛澤東加咗一個「新」字變成「新中國」。呢首歌喺五十年代紅遍大陸，開頭一段歌詞係咁：「沒有共產黨就沒有新中國，共產黨辛勞為民族，共產黨他一心救中國，他指給了人民解放的道路，他領導中國走向光明……」總之唱到共產黨天上有地下無，火紅年代當然唱到個個熱血沸騰。
自從煲呔提出「極端民主等同文革論」，之後又收回道歉，又俾親北京工會阿頭鄭耀棠暗寸「無知」，兼夾建議煲呔要加強國情教育。點加強法，大概港台都想做些少嘢，兼且諗到親中紅人曾憲梓經常向傳媒話，佢每次唱K都先唱一次《沒有共產黨就沒有新中國》，表達愛國情懷，於是港台唔嫌隻歌肉麻，噚日下晝喺老董年代做過謀臣嘅葉國華主持嘅國情節目中，足本播出。
港台播革命歌洗底
本港電子傳媒絕少播放大陸革命歌，以免令人聯想到係咪仿效中央台，咁咪等於變咗一國一制？不過港台唔怕誤會嘅，因為首先阿爺唔會認為播革命歌唔恰當，可能阿爺仲會以為啲香港人會簡單到聽一次半次就信晒隻歌咁講，會有多幾個人愛上共產黨㖭。
不過計八方認為，播一隻革命歌又點會起到加強國情教育嘅作用，倒不如實際啲講吓國情。講咩好？就講醉駕啦，喺大陸，酒後駕駛唔使吹波波調查咁麻煩，只要公安交警聞到司機有酒味，就可以立即罰款2,000蚊同行政拘留15日；如果張文新喺大陸飲到啤啤夫仲揸車，就連「對唔住」都要等到放番出嚟至有時間講。要推動國情教育同港台革新，唔通就係要靠攬女風波同醉駕炒車。
沒有共產黨就沒有新中國
詞、曲：曹火星
沒有共產黨就沒有新中國
沒有共產黨就沒有新中國
共產黨辛勞為民族
共產黨他一心救中國
他指給了人民解放的道路
他領導着中國走向光明
他堅持了抗戰八年多
他改善了人民生活
他建設了敵後根據地
他實行了民主好處多
沒有共產黨就沒有新中國
沒有共產黨就沒有新中國