香港仔同大嶼山兩塊地皮以高價成交，對樓市起火上加油作用，聽經紀講，由於賣地後業主反價反到七彩，買家怕業主再反，遲啲買唔到平嘢，最近撲到入市，一二手市場旺到佢哋都唔信。
賣樓一向唔急嘅恒隆地產（101），趁市旺玩埋一份，推出西九龍大角嘴浪澄灣，即成全城焦點。雖然售價唔算平，但挾臨海市區盤地利，又有現樓即買即住優勢，加上個市㷫烚烚，市場反應唔錯。雖然發展商未正式對外開放現樓示範單位，想入去望吓啲用料同個景，可先向代理預約參觀。
睇完樓，未夠鐘食飯，除咗近近哋行吓奧海城商場，不妨去九龍灣MegaBox，行街睇戲之餘，嗰度搞咗個「藍天再現」萬人藝遊活動，齊齊畫幅藍天再現萬格子油畫。
哈老喂就快到，銅鑼灣時代廣場搞咗個「鬼尋南瓜家族封印」活動，按場內指示搵齊啲封印，可以換「嘩鬼糖果袋」。
