玩具業越來越難做，一來毛利率只得幾個至十幾個巴仙，同喺大陸做房地產簡直無得比。
二來玩具出口到美國，周不時都話有安全問題，隨時成批定單打回頭，即使做好自己本份，都搞到有得震，無得瞓。
不過，喺玩具界屹立咗22年嘅合俊（2700）主席胡錦斌就有另一番見解，佢話做玩具可以令佢勾起好多童年回憶。
胡主席話，佢細個時家境唔係咁好，當時香港經濟仲未起飛，無咩玩具玩，邊似得𠵱家啲細路又PSP，又NDS咁多花臣，佢淨係玩公仔紙都已經玩到不亦樂乎。
儲幾年利是錢至買到
雖然時代改變，但男仔大多數都鍾意玩遙控車、路軌車等，佢仲記得細個嗰陣，儲咗幾年利是錢，先買到人生第一架路軌車。
佢架路軌車，就係𠵱家嘅生意夥伴雅田國際嘅出品，估唔到幾十年後，雙方竟然做咗partner，當年死慳死抵買嘅路軌車，今時今日，竟然由自己間上市公司生產，你話世事幾咁奇妙呢！