亞洲金融（662）有近15億銀淨現金，預測息率4.6厘，防風力特佳，加上核心業務唔係曳，睇位兜底。亞洲金融07年半年度（6月底止）純利表面倒退近9成到3.3億銀，但扣咗06年度同期出售亞洲商業銀行非經常性收益，07年中期實際純利升咗185%，估計全年6億銀，PE7字頭，吸引到爆。
亞洲金融派息亦好慷慨，最新中期每股派息增加88%到9.4仙，保守計數，07年全年派息20.4仙，息率上到4厘6，保險股當中，肯定係高息王。淨現金近15.8億銀，等於每股淨現金1.5元，避風力特強，銀彈咁充足，亦足夠亞洲金融拓展醫療業王國。呢轉睇實4.1元支持兜底，以預期PE10倍做目標，要見5.8元，即係現價（4.38元）要升32%，到時P/B都係1倍多少少。咁穩陣，買咗唔使驚瞓唔着。
安寧昅實0.38元兜底
安寧（128）過去1年一浪低過一浪，睇圖表，肯定唔開胃，但唔代表無投機價值。安寧最新每股淨現金0.28元，係現價（0.405元）近70%，又係另一隻超級現金牛。又安寧最新NAV0.57元，仲有折讓墊底。呢轉短打，昅實短線支持0.38元，股價若然跌近呢個支持，日線圖9RSI會去到20超賣區，進一步加強博反彈贏面，短打博升兩成到0.46元，仲未有耐到NAV水位，但有魚有肉。
錢雋