上個禮拜五係87股災20周年，點知道瓊斯指數嗰日急跌366點，標準普爾500指數就跌咗39點，兩項指數都錄得今年8月9日以嚟最大單日跌幅，十足十為股災20周年贈興。
咁啱嗰日香港重陽節假期冇市，今勻唔知好彩定唔好彩，美股跌咁多，港股有冇可能獨善其身呢呵？仲有，十月喎、股災喎，好邪門！為咗迎接呢個比農曆7月14日更陰森恐怖嘅日子，一眾網友已經趁重陽節長假期擺晒陣，喺網上預備一切，包括股災逃生手冊、股災追揸沽策略、股災大事回顧，最窩心係連報紙嗰份佢哋都諗埋，幫一眾財經老總做好兩手準備，諗定升市同跌市嘅頭條標題，就算股災都冇有怕。嗱，究竟係股災，定係再嚟一個大奇迹日，大家做足準備等今日揭盅！
爆股災逃生有門
遇到火災、漏煤氣，我哋有一系列消防指引；但遇到股災，究竟有乜逃生門路呢？
Devonaoki就提醒散戶網友，股災人多出貨，網上炒股好易死機，「梗係求神拜佛，望滙豐今日唔好死機喇！次次大跌市，都鬼咁多人一齊出貨，真係好大機會死機！」Robmot建議：「家吓好落定盤排定隊喇，仲等！我用嗰間可以喺網上落限價盤排隊出貨同入貨，掛到兩日牌，家吓排定都啱時候㗎喇！」
有人諗盡方法，亦都有人消極面對，Keung941話：「最好唔好睇有關財經嘅新聞、報紙、電台，咁大家會開心啲！」贊格威爾覺得，「一動不如一靜，睇吓祖國嘅神鼓勁啲，定係鬼佬支魔笛醒，至於小股民就真係無嘢可以做，倒不如唞吓仲好！」
網友無懼暴瀉信阿爺
大摩唱淡，話股市會跌到2萬點，網民反應大致分為三類：有30%人信晒，仲話已經沽清晒所有貨；50%人就騎牆，信啲唔信啲，話會減持部份套現，觀望一下市況，再趁低吸納；至於唔信佢支笛，仲話會大手買入嘅就有15個巴仙！
alb2c333話：「大摩想買平貨，轉頭又會出報告叫『買入』，佢哋最鍾意用呢招。」和172946話：「想質低我啲貨，再用低價買，NoWay。」yKho3388就話：「佢哋自己無減持，仲叫人沽貨，大家咪中計。」
verybigapple話：「以前遇到咁嘅情況，實行被大行趁機打劫，好彩阿爺出手，有QDII同埋不日推出嘅港股直通車，實冇死喇！」
最恐怖情景要數97
「十月股災」呢個惡咒靈唔靈，今日就知。提起股災，香港散戶都有唔少親身經歷過（見表）。唔少網民都認為，97股災係最激、最恐怖。網友55699222就話：「試過十幾二十個價位都冇人接貨。」小旋風亦話：「沙士反而冇咁驚，但97真係好恐怖！嗰陣個個都話阿爺為咗面子，唔會畀個市跌，分析員又唱好，搞到好多人按咗層樓又借孖展，係咁炒炒炒，真係諗番都覺得心寒！」又係話有阿爺撐，情況有啲似家吓噃！
經歷兩次股災嘅mmxmmxmm話：「次次股災前，人人都話自己走得切；次次股災緊，人人都話可以執平貨，結果越執個價就越低！」
誤信有阿爺撐唔會跌
之不過，都有人唔愁嘅，好似3993showtime咁，「94年仲係學生嗰陣，就開始買藍籌，雖則高位買完滙豐（005），之後就股災，但一於冇有怕，過一兩年就無事。」Evilgrin仲勇，911開始買股，從來都唔止蝕，越跌越買，又係滙豐，揸一兩年都賺番唔少。
明天財經頭條預告
今日股市會跟隨上周五美股下跌，為股災20周年贈興；抑或喺偉大祖國保護下，無懼外圍跌勢？一切要待今日股市揭盅。不過，噚日已經有網友為明天嘅報章頭條諗定標題，唔多唔少代表佢哋點睇今日股市。
睇好嗰一派代表有：至樂觀嘅大舊BB「外圍股市無礙港股升勢，恒指再撲三萬」、Willauyo「單日轉向，尾市升過千點！」、wms「大奇迹日恒指上破四萬關」。最似樣應該係3993showtime嘅「大時代重臨，港股先跌後急升，直通車下月開行」；FairyKingPrawn仲連落邊張報紙都諗埋「生果日報：17歲中學生跌市日狂賺1000萬」。
有人睇好梗有人睇淡：johntt「市場憂慮美國經濟衰退，受美股周五大幅下跌影響，恒指大跌1400點」、bms8「港股創單日最大跌幅，恒指跌7500點，國指跌4500點」。至悲觀應該係自稱金錢的奴隸嘅網友「五百人IFC大集會，空中飛人詠香江」；仲有dioneo嘅「單日最多人申請破產」，不過，rayray850102就同華華嘅行家開咗個玩笑，「本報超過一半記者，因股市大跌，跳晒樓，今日報紙暫停一日」。至於kdone嘅「民主黨批評政府及三大富豪大舉入市干預」就好有真實感。
mailto:[email protected]
