發展局局長林鄭月娥呢輪馬不停蹄硬銷保育，噚日舉行公眾論壇，兩個鐘有超過一半時間畀佢講晒，又乘機暗踩前阿頭、民政事務局前局長何志平。
林鄭話肥平喺04年明明已經就保護古蹟做諮詢，07年初由於天星碼頭拆卸問題鬧得全城關注，又臨急臨忙做多次諮詢，話𠵱家社會風氣，已經唔容許佢再花兩年時間慢慢諮詢；林鄭又話，「（保育問題）講得出就要做得到」，話緊邊個做唔到，大家心照啦。
踩完前任，林鄭再跟前朝政府劃清界線，佢話重置赤柱嘅美利樓，唔算保育項目，純粹係政府產業署project，當年政府只係從庫房角度考慮，佢呢位保育局長，今後凡事保育優先，好似撥畀社企嘅七幢歷史建築，社企蝕錢話之你，總之唔好整爛幢樓就得。