官恩娜短Boots晒長腿
「今季我會入定5至6對ankleboots（僅及腳眼的靴），因為今年大興呢種boots，所以我已經入咗黑色、啡色同深藍色各一對，每對我個budget都係2,000蚊以下，我見過有啲3000至4000蚊好靚，但係都唔捨得買，因為呢啲鞋可能只係興一季，所以自己都唔會花太多錢買。我主力會襯短裙同短褲，襯埋一對黑色絲襪，就真係非常正。今年秋冬季興黑色，着一身黑成個人感覺瘦啲，真係一舉兩得。」
孫耀威懶人專用帽
「我呢排睇到好多日本時裝雜誌，好多男model都戴冷帽，特別係頭頂開窿嗰隻，所以嚟緊我都會入貨。男仔一向都冇乜配件襯衫，嚟嚟去去都係手鏈同手錶。我覺得冷帽除咗可以襯衫外，仲有一個好處，就係有時我哋出席一啲好早嘅活動之前唔想去salon整頭，咁戴頂冷帽就可以出街啦，非常之方便。」
鍾舒漫圍巾夠百搭
「我覺得秋冬必入嘅就係圍巾，因為圍巾係一件好百搭嘅飾物，鍾意點襯都得，凍嘅時候又可以保暖，最好係色彩繽紛圍巾，因為平時我都係比較鍾意着一啲沉色嘅衫，所以會加條圍巾點綴吓，圍巾越花就越好，可以襯唔同顏色嘅淨色衫。」
吳日言短褲襯長襪
「冬天通常都會着到好厚，其實香港又唔係好凍，我開季時都已經睇好多雜誌，今年又會興着短褲，所以我會買好多短褲露吓隻腳，如果真係凍嘅話，我建議大家可以加對長襪保暖，或者索性着短褲嘅時候加一對襪褲裝飾吓。」
採訪：駱華齡、馬建華、楊潔雯、胡比
