白鴿黨馬丁、單仲偕同人權監察總幹事羅沃啓，噚日終於完成華盛頓嘅訪問，今日會去紐約接受當地傳媒連串訪問。單仲偕同八方講，美國國際事務部副部長保拉多布蘭斯基噚日見完佢哋先至見達賴喇嘛，八方心諗，唔通美國重視香港多過西藏？馬丁急急解釋，話純粹係時間上嘅巧合，佢哋此行同達賴冇見過面。
雖然同宗教領袖緣慳一面，佢哋三人噚日見美國國務院亞太署理秘書長戴維斯，會面地點安排喺身在海外、忙緊六方會談嘅助理國務卿希爾（ChristopherHill）間辦公室，馬丁話見到間房放咗好多特色武器，仲有幾把長刀喎。希爾經常周圍飛處理國際事務，八方忽發奇想，唔通美國人都學吓中國風水，放幾把刀嚟大殺四方？