𠵱家啲新人真係好彩，行起運嚟上位仲快過搭飛機，但新人當中有好多唔單止唔識珍惜機會，而且仲一朝得志亂咗神志，起步冇幾耐就已經識得扮大牌揀嘢做，就好似最近靠放生電上位嗰位《廚房魔女》「丁丁」咁，恃住有大把男fans支持，人氣有升冇跌，就恃紅生驕。
拒做佈景板
關仁聽講話有個監製想搵佢做個迷你新節目，想話畀多啲機會佢曝光，又可以吸引多啲男觀眾，點知丁丁話如果係行行企企冇乜對白講嘅job就唔好預佢，激到個監製死死吓，估唔到個𡃁妹仔恃住有啲人識佢，就乘機擺阿姐款，如果第日畀佢真係做咗阿姐嗰陣時咪仲不得了，個監製話以後有節目一定唔會再搵丁丁做，放長雙眼睇佢紅得幾耐。
Textby關仁
