喺沙田馬場睇跑馬，如果嫌有悶場，可以欣賞吓彭福公園嘅花草樹木美景及為奧運馬術賽而設嘅馬術練習場地。如果揸住望遠鏡周圍望，可以睇到城門河東岸嘅樓房，有幾棟樓坐擁無敵河景與馬場景，點解賣來賣去都有貨尾賣呢？箇中原因，大家去睇吓便知。樓房後面有青山，在沙田療養院後面，唔知點解有條路上山，山腰有一群建築物，外形美觀，但從呢群建築物再向山上走，大概幾百公尺之外，有幾座樓房，似乎戒備森嚴，究竟係乜東東呢？
馬圈人士有好多住在駿景園，一位人士話：「沙田療養院後面上山見到嘅第一堆建築物，聽講係突破機構大本營，突破再上嗰座樓，就唔知係乜咯。」
呢日碰到一位與突破有關嘅朋友，一講起沙田「突破」，佢就笑到四萬咁口，佢話嗰幅係非商業非住宅用地，十零年前有學校申請，不獲批准，突破去申請，竟然OK，於是在山上興建宿舍、會場、度假營地，係舉辦郊野活動嘅最佳場所，乜唔係啫，位於沙田，接近市區，交通方便，但獨處山上，遙望西北有中文大學，正西有馬場，西南係沙田市中心，景觀一流。行山嘅話，走路兩個鐘頭，攀過山頭就可以到西貢，故此該營地大受歡迎，一年有十萬人次到沙田「突破」營地玩樂，修習。
咁樣「突破」附近嘅建築物究竟係乜呀？呢位朋友話：「兒童院，屬關閉式。不過當局已在屯門興建一座更大嘅兒童院，所以沙田呢座已經丟空咗，目前冇晒用途，將來唔知點樣處理。」咁靚地點嘅地皮，啲富豪馬主在馬場用望遠鏡一望就會流口水，做兒童院？嘥唔嘥啲呀？呢塊地皮，如果地積比率係0.8或更低，起碼值一兩億元啦，買入之後再拆建，最啱身家有十零億起碼嘅富豪用嚟做住宅，唔使問紫微楊，都估到風水好好！如果政府話廢棄咗嘅兒童院只能作非住宅用途，供非牟利NGO申請嘅話，財雄勢大嘅宗教團體就開心咯，一定爭餐懵。