政府建議為各局設副局長及局長政治助理職位，副局長負責協助制訂政策及立法建議，並可代局長出席會議，局長政治助理負責草擬局長的講稿，聯繫各界團體及傳媒，副局長月薪約19萬至22萬元，局長政治助理月薪約10萬至16萬元，一條大數，連埋請秘書、司機、助理嘅助理，一年開支約5000萬元。
此消息一出，當然有反對人士撲出嚟批評此舉嘥錢兼令局長嘆世界，唔使做，又有人代開會，又有人教埋點講嘢，咪即係可以有肉體冇靈魂咁齋坐喺冷氣間做大食懶？自己睇到政府呢項建議時都打咗個小突，唔係因為要使錢請人，以今時今日股市每日成交二千幾億嚟講，每年五千萬真係濕濕碎，只係喺未請呢啲副局長同埋局長政治助理之前，嗰啲嘢究竟係邊個做緊？唔通真係本來由局長自己一腳踢做晒？係我就驚。
在電視特輯《與CEO對話》中，好幾位跨國企業的超級CEO不約而同強調作為一個舵手，最重要的是長期保持輕鬆愉快的心情，只有這樣，才能擁有冷靜的頭腦及靈敏的市場觸覺，如果終日只為紛紛擾擾的瑣事擔心，根本看不清形勢，也作不出方向性的重要決定，像一位將軍分析局勢後，決定何時、如何去打一場仗，至於許多繁瑣的DirtyWork便放手交由下屬執行。副局長代表開會但不代表可以下決定，局長政治助理代撰講稿不代表局長一定同意照着講，作為領導，為香港市民謀幸福，我贊成讓局長們多騰出腦空間作明智決定，當然最基本先決的條件是這群領導要有才，真係做到嘢，幾年前，我們不是抱怨過前特首太勤力，事事太親力親為嗎？