電腦特技真係非常厲害，由《阿甘正傳》（ForrestGump）導演羅拔湛米基斯（RobertZemeckis）執導嘅電腦動畫神話傳奇片《魔戰王：貝奧武夫》（Beowulf），成功將瘦到好似有厭食症嘅安琪蓮娜祖莉（AngelinaJolie）回復索爆身材，變成性感惡魔之母不特止，仲將原來得五呎十吋嘅大肥佬演員變成六呎六吋高嘅金髮維京戰士，簡直係3D電腦動畫嘅新境界。 撰文：戶川淳
下月15日上映嘅《魔戰王：貝奧武夫》改編自古老嘅西方神話，主要講遠古嘅魔法年代，驍勇善戰嘅維京巨人貝奧武夫，喺群雄之中挺身而出，拯救丹麥國王，打敗咗橫行大地嘅惡魔格蘭杜，咁就激起惡魔之母嘅怒火，佢不擇手段向貝奧武夫報復，貝奧武夫呢段世紀大戰仲傳頌千古，聽落又似係《戰狼300》（300）之類嘅故事，連啲飛箭場面都好鬼似。
10年改寫劇本
其實套片單係劇本已經唔簡單，世界著名嘅魔幻故事作家尼爾蓋文（NeilGaiman）同《危險人物》（PulpFiction）嘅金像級編劇羅渣艾法利（RogerAvary），用咗10年時間將這傳說故事寫成劇本，而金像大導演羅拔湛米基斯再次以電腦動畫《北極快車》（ThePolarExpress）開創嘅「表演捕捉」（PerformanceCapture）電腦特技拍攝方法去製作呢套片，令電影好似真人片同動畫片混合。
安琪蓮娜祖莉所演嘅惡魔之母，係一隻能夠變做人類嘅「性感蜥蜴」，佢係一隻怪獸，亦都係一位母親，所以喺片中集合性感同恐怖於一身，即使𠵱家嘅佢瘦到似厭食病患者，不過喺電腦打造下仍然可以係索爆嘅靚女。
好戲演員壓陣
最過癮係片中嘅大隻佬男主角貝奧武夫，原來佢係主演過《虎視眈眈》（SexyBeast）同《無間道風雲》（TheDeparted）嘅英國演員雷溫斯頓（RayWinston）嘅化身，雷都好驚訝表演捕捉呢種技術嘅妙處，居然可以將佢五呎十吋嘅肥佬身形，拉長做六呎六吋高嘅金髮維京巨人。
其他演員亦唔嘢小，好似有勁好戲嘅奧斯卡影帝安東尼鶴健士（AnthonyHopkins）同尊麥高維治（JohnMalkovich），安東尼仲係首位被選嘅演員，佢扮演國王路庫加時仲用自己嘅威爾斯口音嚟演，因為佢認為威爾斯語係一種古老嘅語言，襯晒套片。《魔》片仲將會作電影史上最大型嘅3D電影公映，等觀眾完全投入一個用真人演技混合電腦動畫技術嘅神話世界。
原著小八卦：長詩篇列作教材
《貝奧武夫》係一部3,000行嘅長篇詩作，根據公元六世紀嘅戰役所寫。雖然故事大部份發生喺丹麥，但卻由英國北部嘅安格魯薩克遜人喺200年後記載下來，佢哋視自己為維京人，仲認為佢哋嘅英雄都來自北歐，但冇人知道邊個至係真正作者。《貝奧武夫》嘅文學價值一直以來受到質疑，但喺20世紀經由《魔戒》作者J.R.R.托爾金撰文平反，佢指出《貝奧武夫》唔係普通神怪故事，而係一位年輕人自覺地步向死亡嘅經過。今天，呢篇詩已被廣泛用喺美國高中嘅教學課程之中。