港台節目《傳媒春秋》全新一輯噚日首播，新環節《傳媒人──環球系列》頭炮訪問壹傳媒老闆黎智英。
人稱肥佬黎嘅佢，喺訪問中多次提到不會為政治及商業利益妥協，更加唔想做「契弟」。八方見節目打出字幕，將「契弟」寫成「奴才」，究竟「契弟」點解？肥佬黎嘅定義係：「出賣良知嗰啲人我稱之為契弟。」
除咗講到個人信念同香港傳媒生態，肥佬黎仲畀攝製隊由辦公室跟到返屋企，又由香港跟到去台灣，揭開佢日常起居生活嘅神秘面紗，如果八方冇記錯，相信噚晚係肥佬個招牌大肚腩首次赤裸裸咁喺電視曝光！不過，就喺佢着番起件浴袍嘆茶之際，節目亦告完結。吓？原來下星期至播下集大結局。