十七大啱啱開完會，雖則冇驚天動地嘅調控樓市新措施出台，但之前人民銀行、銀監會宣佈，買第二層樓嘅最低首期由三成增加到四成。
估唔到居然會好似當年香港前特首董建華嘅八萬五一樣，對樓市有咁大震撼，搞到大陸樓成交量跌唔少，炒家有得震無得瞓。華華噚日喺《新浪財經》睇到以下兩個個案，應該可以反映到深圳樓市家吓有幾震盪。
喺深圳有10個單位揸手嘅大陸炒家郭和才話：「最近非常難受，雖然層樓升值唔少，但都係賬面數字，事關幾個月嚟一直搵唔到人接貨。」佢仲話全部貨都係做按揭，聽聞會放寬加息幅度，若果係就死，到時唔知點算。
港樓教訓未敢忘
內地炒家心驚驚，港燦炒家都唔見得好過，好似有5個深圳單位喺手嘅李欣雲咁，由9月到𠵱家周身唔自在，前幾日終於「打折」賣樓，唔再企硬嗱嗱聲放晒佢，「上個月深圳樓市調整加速，打折放盤嘅人越嚟越多，骨牌效應可能會加大。」結果賬面賺少20萬銀。
佢仲話見過上世紀90年代香港樓市嘅瘋狂同慘淡，家陣深圳樓市嘅風險比當年香港仲大，因為香港只係彈丸之地，大家塘水滾塘魚；但深圳係移民城市，流動人口多，周邊又有大把地起樓，一個政策，資金就好容易外流。
唔通十月真係咁邪，香港散戶驚股災，大陸炒家就驚樓災！