陳太今日報名參選，正式用候選人身份喺港島區補選戰場同葉劉拗手瓜。呢排陳太日日落區派傳單，或者去茶樓拉票，佢話，以前成日喺假日同奶奶呀、仔仔女女呀一齊去飲茶，但宣佈參選之後就忙到震，所以近排都少咗一家人嘆茶嘅時間。
陳太出親街都被人讚靚女，唔知係咪同佢上茶樓專揀啲清淡嘢食有關？陳太自爆啲孫仔孫女同佢食嘢嘅口味好唔同，事關細路仔梗係鍾意食啲香口煎炸嘢。雖然冇咁健康，但陳太話冇所謂，只要佢哋食番多啲蔬菜咪得囉。陳太仲有個喺外國讀書嘅孫女放緊假，老公陳棣榮飛咗過去陪孫女遊山玩水；至於佢自己，睇怕要到12.2選舉完結後先可以休息吓。