神華能源（1088）今個月9號回歸A股，短短幾日急升咗近1.5倍。大家對佢忽然樂觀，就連瑞銀今個月10號都出咗份關於神華嘅研究報告，大幅將一年目標價由35.15元，調高到101元，震撼投資銀行界之餘，仲成為過去兩星期中港財圈抨擊對象。雖然份報告10號出街，但噚日華華上《新浪財經》，仲見到有關呢份報告嘅評論文章。
對於101元估值，相當於市盈率74倍，有評論認為絕對荒謬，報告忽略近年煤炭企業生產成本超過煤價上漲嘅情況，將煤炭同黃金相比，睇得過份樂觀。𠵱家神華嘅營運成本快速上升，日後亦唔可能以低價收購煤炭資源，就連同行美林同里昂都唔認同瑞銀看法。美林話，煤唔係金唔係銅，只係到處都有嘅資源；里昂研究部主管甚至公開話，神華如果出年見101蚊，就着短裙示眾。
神華過去兩年多，由幾蚊雞股票升到𠵱家超過50蚊，淨係計最近兩個月已經升咗一倍，會唔會見101元就要放長雙眼睇。