點解要將公司上市？不外幾個理由，其中的正面作用，一係公司想利用資本市場集資，發展業務，毋須單靠銀行借貸做生意，公司營運較靈活，二係想藉上市打響公司知名度，爭取更多或更大的機會與生意。
負面來講，公司上市有可能係想藉股市作為提款機，耐不耐就「抽水」，又或者大股東可能認為盤生意前景冇乜看頭，趁機上市套現袋袋平安。
跌穿2.5元止蝕
近月新股不少，一向並不熱衷抽新股的星俠，雖覺事不關己，但都有留意箇中新股。好似波司登（3998）在內地無疑相當有名氣，搞上市好合情理，但全球暖化之下，羽絨生意又有幾大發展空間，實值得斟酌，但趁市旺上市，你又有何睇法？
其他新股上市至今，星俠認為中國澱粉（3838）似欲蓄勢再炒一轉，該股上市當日雖曾跌穿招股價，但隨後即見真章，炒上4.70元後才漸見回順，經過近兩周整固後，似已在2.80元覓得支持，可趁大市調整買入，博升破高位4.70元，跌穿2.50元止蝕。