李克勤被鄭裕玲（嘟嘟）踢爆其太太盧淑儀將於下月初分娩，還有一個多星期便喜見麟兒出世的準老竇克勤，笑謂將農曆年舉行的紅館個唱，取名為「李克勤育嬰心得演唱會」，以滿足關心他家事的朋友。
李克勤、容祖兒、李蘢怡（Tiffany）及袁偉豪等，前晚在將軍澳電視廣播城演出《仁愛堂善心飛躍三十載》，之前鄭裕玲公開踢爆克勤太太盧淑儀預產期為下月初，作為準老竇的克勤前晚接受訪問時，笑言嘟嘟春風滿面，乃太開心才爆料，克勤說：「佢唔講都講咗，由佢啦，我唔會嬲。啲人估會係阿倫（譚詠麟）爆，所以佢一早叫我唔好話佢知。」
冇收過阿倫厚禮
有雜誌指阿倫和陳國強等好友均準備送厚禮給克勤兒子，對此克勤說：「我要鄭重澄清，冇收過雜誌所講嘅禮物，朋友唔係講錢嘅，在乎講心啫，佢哋已經送咗好多祝福畀我，小朋友唔需要咁貴重嘅禮物。」
至於克勤送八卡鑽石給老婆及買鑽石奶嘴給兒子的傳聞，他謂：「我要畀心機工作，開演唱會，啲人好關心我家事同生仔，我考慮個騷叫做李克勤育嬰心得演唱會。」有指他會在個唱上播兒子的生活片段，克勤謂：「我唔係咁高調，𠵱家冇呢個想法，到時會唔會開心得滯就唔知，劉德華叫我將個舞台搞到好似屋企擺設，一家三口開開心心開演唱會喎。」
Tiffany熱舞遮紋身
Tiffany前晚與袁偉豪大跳Salsa舞，但她今次舞衣不及之前與黃秋生跳時性感，連任司儀的葉翠翠也穿得比她搶眼，Tiffany說：「啲衫無綫做嘅，都好靚，我唔想俾人見到紋身，而且我未知簽邊間公司，所以𠵱家盡量唔性感，都唔知未來間公司想我用乜形象。」Tiffany的母親是仁愛堂總理，她表示母親開會時有提議讓她參與演出。
採訪：卓美娟
攝影：陳偉權
