政府宣佈政治委任副局長，局長政治助理嘅詳情，講人工就相當唔錯，副局長薪酬等於局長嘅六成半到七成半，政治助理薪酬就有局長嘅三成半至五成半，以銀紙計，前者月薪十九萬三千七百元至二十二萬三千五百元，後者月薪有十萬四千三百元至十六萬三千九百元，有志者大可申請。不過入職第一個要求就係認同特首理念、政綱，不少人立即肥佬。
香港冇外國政治委任傳統，問責局長制推行咗五年，仍然未進入狀態，久唔久就有蝦碌，而今倡設十一名副局長，十三名政治助理，呢二十四名新人與AO系統如何合作、磨合，好有疑問，第一批勇士可能成為炮灰，為後來者鋪路而已。更有傳言話民建聯「黨員」之中嘅律師人物最有希望成為副局長，黨派之爭怎能避免？
與一位年青有為嘅回流畢業生講起，佢不屬任何黨派，係初生之犢，雖然對香港政治仲係矇查查，但躍躍欲試，想話做局長政治助理之類。畢業生話：「我唔怕做炮灰喎，美國好多政治助理職位，做幾年當係累積經驗，喺CV上多寫一筆，轉去商界搵工，係一個Plus（加分），香港會唔會一樣呢吓？」左丁山認為呢位畢業生太新嫩（green），對本港傳媒完全冇認識，若果自己係局長，都唔會請佢啦，勸佢唔好咁心頭大住。但經佢一講起，突然間諗到，歷史系教授L位公子自小在外國生活，喺美國攻讀政治及生物（雙主修），仲好似去過華盛頓做國會實習生，畢業後返到香港做公關與企業傳訊，熟悉與傳媒打交道，近年又讀埋中大MBA㖭，如此人才，做局長政治助理簡直fit到漏油。問吓小公關K，對L公子印象如何，小公關K話：「哎吔，L公子氣宇軒昂，靚仔迷人，講英文好好聽，兼且溫文有禮，梗係有資格做局長助理啦，不過唔知佢會唔會認同特首施政理念呢？美國留學生又會唔會招人妒忌，話外來勢力干預呀？」小公關K果然有諗頭，為免西環有人產生疑慮，局長政治助理最好係香島、培僑畢業生，隸屬民建聯就更加啱聽。