上個禮拜五，花旗國道指跌咗三百幾點，今日特區股市開市時應該會跌得幾甘。當然，好多股民都期望祖國股市會繼續升，托吓我哋，因為可以繼續炒「A、H股差價消失概念」。不過恐怕事與願違。孫柏文曾經講過，A、H股差價要完全消失，一定要A、H股互相流通──即係可以攞H股返上海當A股咁賣。
大家可能話：「上個禮拜咪已經話會研究互相流通囉！差價消失概念應該越嚟越強！」係。全中！不過最弊呢個簡單邏輯，連祖國股民都知。差價收縮，對於特區股民等於H股升到A股嘅股價；對於祖國股民嚟講，分分鐘可能係A股跌到落H股嘅股價。
沽壓肯定浪接浪
不過今日市況係點，都好難抵禦花旗國今晚將會有嘅跌勢。重型機械製造商Caterpillar喺禮拜五嗰句：「今時今日花旗國貨車運輸業，係50年嚟最差。」市場一定未完全消化。今個禮拜將會有好多上市公司提供（即調低）未來盈利預測，分析員只要將盈利預測plug落條「估大市走勢」方程式度，沽壓肯定一浪接一浪。樓市泡沫爆破就係咁，我哋特區人民最清楚。上個禮拜五可能就係花旗國股民夢醒日，知道減息照死。
06年7月，我寫過篇題為「花旗國樓市將慘過八萬五」嘅文。大家繼續放長雙眼，睇吓會唔會靈驗。
再講，早排8月17日，我寫過篇「泡沫爆破後坐監大熱門」嘅文。因為每一次喺花旗國有泡沫爆破，花旗國嘅民粹政客，一定會搵啲「高調，不過無罪人士」嚟祭祭旗、做做show。
上次科網泡沫，就搵咗教人煮餸嘅MarthaStewart。咁今次樓市爆破，我就喺篇文預測最有機會出事，就會係花旗國最大按揭中介公司CountrywideFinancial行政總裁Mozilo。都係嗰句，大家繼續放長雙眼，睇吓會唔會靈驗。
花旗銀行家大鑊
最後，上個禮拜花旗國政府已經「溫馨呼籲」啲銀行，搞個叫MLEC嘅「接收冇交易、冇市價債券」超級基金。一個債王BillGross雖然有份參加，不過照樣評為「廢柴」嘅建議，啲銀行睇嚟有排煩。喺八萬五最黑暗嘅日子，特區業主買過好多鑊同好多炭。孫柏文相信鑊同炭喺花旗國將會熱賣，不過買嘅唔會係啲業主，而係啲銀行家。
金手指網誌：
http://phatdat.blogspot.com