最和味─加尼特
（塞爾特人前鋒）
喺96年，加盟NBA只有兩季、年齡只得21歲嘅加尼特，竟然獅子開大口，向木狼開出6年總值1.26億美元（約9.8億港元）嘅巨額續約條件，令整個北美體壇為之嘩然，亦令KG成為當時最叠水嘅運動員。11年後，KG嘅叫價力雖然唔及當年，但係佢過檔塞爾特人嘅薪金都好驚人，簽約5年盛惠1.05億美元（約8.1億港元），即每季成2,100萬美元，幾乎等於整個後備席二線兵嘅人工，塞軍呢鋪真係賭得幾大，不過KG就認真和味囉！
最羞家─湯馬士
（紐約人總裁兼教練）
自從3年前湯馬士入主紐約人做總裁後，呢支大蘋果球隊真係未好過，唔單只每年開支最高，而且連續3季都未入過季後賽。過去3季湯馬士使咗一大筆天文數字嘅寃枉錢，簽咗一個又一個廢柴，最後十居其九唔係長坐冷板凳，就係要買斷約送走瘟神，單喺上季送走前教頭布朗就用咗成2,500萬美元（約2億港元）。最近湯帥仲衰埋性侵犯，要賠償1,160萬美元畀受害者，簡直係顏面盡喪，試問佢仲有乜面目再當其總裁兼教練？
最心酸─傑特
（網隊後衞）
34歲的網隊控衞傑特近年都算多災多難，經常受傷之餘球隊成績又每下愈況，想喺退休前攞番個總冠軍嘅機會已越來越渺茫。如果傑特當年應好友鄧肯嘅要求過檔馬刺，上季捧住NBA總冠軍同MVP獎盃慶祝嘅人就唔會喺柏加。不過令傑特最心酸嘅可能係睇住柏加同伊娃相擁熱吻嘅情景，因為佢同前妻祖美娜唔單只婚姻破裂，而且仲鬧上公堂，雙方互指被對方虐待，家醜傳千里。眼看人家情場球場皆得意，自己卻一無所有，傑特真係百般滋味在心頭！
最飄飄然─戴林比特
（76人中鋒）
效力76人嘅中鋒戴林比特原藉海地，但呢位身高接近7呎嘅中鋒，就喺今個夏天「轉投」加拿大，穿上紅白戰衣出賽。講真，戴林比特雖然人高手長，又夠靈活，但技術就好一般；估唔到依然吸引到加拿大教練「賞識」，讚到佢天上有地下無，仲力勸佢加盟㖭。戴林比特14歲就由海地搬去蒙特利爾定居，係咪好鍾意加拿大就唔知喇，至少今次「轉會」，可以一嘗俾人捧到上天嘅滋味先！