電影《兄弟》說的是血濃於水的兄弟情，苗僑偉及陳奕迅最重戲，看過的人都大讚Eason演技出色，是整齣電影的一大驚喜，Eason說：「導演叫我幻想自己係《英雄本色》裏面嘅張國榮，一個天真嘅年輕人遇上黑社會，其實我個角色易發揮，三哥個角色先難做，佢同黃日華、湯鎮業嘅角色都好壓抑，相對咪會覺得我出啲囉。」
華仔也大讚導演找對了人：「寫劇本時係有少少將《英雄本色》嘅張國榮作為藍本，分別在於我哋重點寫張國榮個角色，講兄弟情，唔多講黑幫。Eason做得最好係演繹個角色天真嘅一面，佢係我哋好銳意想喺呢類型電影搵嘅新血，唔係一講英雄片來來去去嗰幾個。我夠可以演細佬角色，但劉德華行出嚟話畀人知唔係黑社會？行開啲啦你，Eason就可以做到，佢真係一個好選擇。」
四虎鬥好戲
首次與華仔合作，Eason自言獲益良多：「華仔好戲在會加一啲嘢去幫助佢演繹個角色，有時係加一啲更立體嘅動作，但又做得好自然，佢本身好有魅力，眼神尤其厲害。」華仔在這齣戲看到的是：「睇四虎喺酒吧裏面一場戲，我哋已經唔係以前嘅四虎，真係四隻老虎，每個人都有爆發力。」
一部電影能讓觀眾看完後有所得着的才叫出色，《兄弟》就包含很多不同的訊息，講命運、講親情、講信任，華仔的看法是：「套戲嘅訊息喺主題曲已經講咗，每個人睇任何嘢都有唔同角度唔同見解，乜嘢叫啱乜嘢叫錯呢？你嘅左手邊即係我嘅右手邊囉，有時大家為同一樣嘢拗餐死，兄弟反目就只係為咗好小事。」
確實是不同角度看到的都不盡相同，Eason說：「我得到嘅訊息係講family一定唔會害你，對親情可以完全信任，可能我屋企畀我家庭觀念好重，由細到大全家人好close好團結，所以第一樣嘢睇到呢啲。如果家人傷害我，我都唔知後果會點，可能會變咗個變態嘅人，好多觀念都會變晒，我都唔識handle呀。」