【東京直擊】第20屆東京國際電影節前日正式開鑼，台灣女星桂綸鎂都有份參與。前日佢為電影《最遙遠的距離》喺電影節舉行咗一場影迷座談會，同fans見面。
外表斯文嘅桂綸鎂，俾導演林靖傑踢爆佢拍戲時非常百厭。喺台東拍戲時，桂綸鎂妄顧衞生，竟然玩雞屎，唔單止周圍整蠱人，仲搞到自己成面都係，結果貪玩嘅桂綸鎂肚痛收場，真係報應。台上嘅桂綸鎂聽後非常尷尬，以笑遮醜。
范冰冰低胸搶鏡
今年適逢係中日邦交回復正常35年周年，東京電影節內舉行嘅東京中國電影周，噚日喺東京澀谷文化村揭開序幕。代表內地出戰奧斯卡最佳外語片獎嘅電影《雲水謠》男星陳坤，同導演尹力都有現身，不過始終不及低胸示人、打扮性感嘅范冰冰搶鏡。此外，導演彭浩翔噚日喺當地為《出埃及記》舉行影迷座談會，已連續四年參與東京電影節嘅彭浩翔，自爆剛拍完嘅新片內有杜汶澤嘅全裸鏡頭。
