（1）FloolwMe07年頭炮推介中國燃氣（0384），打得好響，今年升幅135%。今期推介另1隻燃氣股鄭州燃氣（3928），作為首選對象，中期可重遊舊峯2.56元，潛在升幅65%。短炒，則可見2元，趁美股散辣起跌市撈貨。
內地天然氣行業，前景靚爆鏡，13億人口加經濟起飛，威力點止1加1咁簡單。目前全球每年人均天然氣消耗量達403立方米，但國內只係25立方米，未來增長空間大到好難計算。
朝陽產業更朝陽
鄭燃業務主要集中在河南省會鄭州市，雖然一個市，已經唔係少嘢。FollowMe06年1月開檔，第二周即推介鄭燃，由0.68元起步騰飛，到今年7月高見2.56元，大飛276%，回報和味過和味龍。去年已經指出，河南係中國第1大省，人口近9,800萬，佔全國近7.5%，對天然氣需求之大自然亦係No.1。面對浩瀚商機，鄭燃已踏出另一步，引入煤氣供應項目（見右上角Box），令呢項「朝陽產業」更加朝陽。
睇好鄭燃，係因為鄭燃比同業更早進入收成期。鄭燃早在86年開始建立燃氣管道，創內地先河。幾年後先至有中國燃氣、新奧燃氣（2688）與中油燃氣（0603）進駐各大城市。經營天然氣有別於其他行業，起碼要搞10年以上才見回報。鄭燃已有21年歷史，肯定已進入全熟期。中國富強起來，唔講得笑，燃氣需求砰砰聲，鄭燃食正條水，盈利猛增可期。
鄭燃07年度（12月年結）上半年營業額4.41億元（人民幣．下同）。增22.9%，盈利7,201萬元，增25%，睇落一般，計落好勁。原來期內由創業板搬到主板掛牌，用咗近800萬元，又加上畀企業稅按33%計算，多付3,615萬元。以稅前業績計。唔計呢兩個項目，實際賺1.16億元，增幅高達70%，勁到飛起。
追落後佳選
以此推算，只要業務保持上半年度進度，鄭燃07年盈利預測1.50億元，增35%，每股盈利0.121港元，現價1.57元，PE僅12.9倍，相對於中國燃氣預測PE38.4倍，新奧30倍、港華燃氣（1083）47.2倍，平均低66%，即使重返52周高位2.56元，PE亦只係21.3倍，平過同業4成半，成為最佳追落後對象，唔買走寶。
搵同一拍檔
鄭州燃氣（3928）主席閆國起，與「亞洲股神」李兆基「英雄所見略同」，搵拍檔都搵同一間公司。
山西有間「晉城無煙礦業公司」，中華煤氣（0003）搵佢合作發展內地煤氣業務。最近，鄭燃亦同呢間公司，簽合作協議，由佢向鄭燃每年供應8億至10億立方米煤氣。嘩，相等於鄭州市天然氣供應量的3倍。
鄭州市對燃氣需求勁到爆炸，有3億立方米缺口要填補，鄭燃拍埋晉城無煙礦業，攞到充裕的供應量，未來幾年盈利增長，肯定厲害。
百仕達大超值
（2）今周副選百仕達（1168），短線目標3.50元。
上周四假前交易，北京北辰（588）勁升7%，往績PE去到32.6倍。百仕達同日只升2.5%，往績PE只站8.1倍。
百仕達07年度（12月年結）預測盈利大增9成至18.3億元，每股0.56元，現價2.46元，預測PE低至4.4倍，低過晒所有內房股，大超值。睇P/B，百仕達只係1.65倍，如果同合景泰富（1813）的6倍比較，更加令人大流口水。見3.50元目標價，PE都只係6.3倍。
百仕達上周三忽然宣佈每20股送12股威華達（622），本月31日（計埋呢日）之前上車，有獎品攞，折合每股0.28元的獎品，咪錯過。
高彰坡