做兄弟，有今生冇來世，不是人人適用。
劉德華和劉德盛可以，陳奕迅與陳澤迅也行，血脈相連兼有緣份嘛。
好朋友稱兄道弟的那種呢，今時今日，還有沒有義薄雲天？
劉德華得真兄弟願傾身家相救，也遇不少假面人趁火打劫。
陳奕迅借錢給兄弟，一借冇回頭，從此定下義氣底線。
功利社會，有時兄弟兩個字鬥不贏一個字。
一句到尾：講錢失感情。 撰文：蔡如玉
老友傾3,600萬身家
劉德華有三姊、一弟和一妹，他與弟弟劉德盛相差四年，感情很好，兩兄弟長大後仍共住一室，直到年前，弟弟迫不得已搬走，現在說起，華仔眉宇間帶點失落：「佢頂唔住啲仔女成日俾狗仔隊追住影，然後話係我生嘅，搬走咗唔諗住返嚟。」
弟弟小時候常被指長得比華仔俊俏，長大後沒人相信他是劉德華親弟，華仔說：「我哋輪廓有啲似，我梗覺得佢靚仔，不過佢𠵱家肥啲，留到滿面鬍鬚，好似麻原彰晃，話佢似林雪細佬仲多人信。大家都係火爆小子，但從未試過嘈大交，有時頂撞幾句，一陣間就冇嘢。」
劉德盛以往曾為外國雜誌做graphicdesigner，後來與華仔合資開公司，發展越來越大，最後連哥哥的股份也買下，華仔說：「合作時都係佢做主導，所以冇乜爭拗，以前佢幫我做過兩個project，《天意》張唱片同埋《91神鵰俠侶》，佢同開外國人士打工，準時返工放工，好唔習慣同娛樂圈工作，做完後話唔再合作，頂唔住呀。」
手足陪講數
華仔續說：「兄弟朋友親情乜都好，都要講緣份，冇得經營。」因此連好朋友昇華的「兄弟」，華仔也願無條件付出：「我當得係兄弟，就唔會同佢計較，直到我會同佢計，即係我已經唔當佢係兄弟，至於對方當唔當我係兄弟，係永遠唔會知，信就得。」功利社會，這樣很易被傷害？華仔認為：「呢啲人我遇過唔少，多數圈外人，佢哋唔當你啲錢係錢，借完唔還仲要周圍唱你，有啲就攞我哋嘅朋友關係去當人情賣，由佢哋啦，唔傷身咪算囉，發現咗之後唔再做朋友，唔開心實有，如果害到我要乞食就一定會fightback，我𠵱家又冇乜嘢呀。」
有好人有壞人，華仔一位相識十多年的好兄弟，曾經在他需要6,000萬打官司時，傾3,600多萬身家相救，「當時我資產被凍結，起碼要六個月至一年先還到，佢連零頭都計埋畀我，雖然我選擇問銀行借，但佢呢個行為，咪係真兄弟囉；仲有一個，喺我以前拍戲，一個人喺調景嶺對住啲大哥講數，剩番佢一個唔走陪住我，佢一路幫緊我做嘢，都係兄弟。」曾經受兄弟最大傷害的，也是那次官司，「嗰個所謂兄弟，竟然怕我輸官司就冇得執，想快啲喺我身上搵着數，錢真係好易睇出一個人。」
大哥攞200蚊記一世
陳奕迅只得一位哥哥陳澤迅，兩兄弟相差六歲，感情融洽，Eason笑說：「只有我蝦佢，佢脾氣好會讓我，我哋都好夾。我哋只係試過細個玩玩吓嚟真打吓交，男仔都會咁。」
哥哥給他最難忘印象是街上討錢的經歷，Eason說：「好多年前仲讀緊書，有一次我喺銅鑼灣行行吓街，突然有個人走埋嚟問我攞二百蚊，我嚇一跳望真啲，原來係阿哥，於是我就畀咗佢，諗番覺得好好笑。」Eason自言與哥哥是兩個極端的人，自己健談好動，對方內斂不愛說話，Eason補充：「佢身材好過我，對腳冇咁粗，佢唔鍾意唱歌，又靚仔，我哋係啲動靜相似咋。」
借錢傷感情
哥哥如手足，Eason願意付出，他說：「兄弟如手足，血脈相連，有乜困難一定會幫，有乜開心都會分享，當然我會希望我對佢好，佢都對我好。」
非親人的「兄弟」呢，男人與男人成為要好朋友，就會稱兄道弟，Eason隨口說出沒有血緣關係的兄弟，有謝霆鋒、梁漢文、蘇永康，Eason與他們相處之道是：「人大咗會講多啲鼓勵說話，有時見到對方唱得好，就讚吓，想講咪講囉，冇乜所謂娘，如果係表現唔好，講真話係踩嘅先要諗吓會唔會hurt到對方，如果timing唔啱咪遲啲講囉，假如講咗對方覺得係惡意都冇法，我只係為佢好啫，但大家都會明白。」
做兄弟，義氣二字大過天？Eason不同意：「睇乜啦，借錢係底線，一係講明送畀你就算，幾千幾萬都唔係大問題，再多就唔得，因為真係會傷感情，其實借嗰個都好難開口，通常我會sayno，如果真係好緊急可以一班人集資，唔好搵一個人借筆大嘅，我試過有個圈外朋友，第一次問我借完還咗，再借多次後，過咗兩年都冇表示，我搵間財務公司去收數，對我嚟講幾萬蚊已好多，唔係有冇能力嘅問題，係真係會冇咗個朋友。」
攝影：林德雄
場地提供：置地文華東方酒店
化妝：阿麗(劉德華)PoChan(陳奕迅)
髮型：DerekLiofii(陳奕迅)
