一位剛退休的女士，現時每個月使萬五蚊，佢有一筆數百萬嘅積蓄加退休金，但驚坐食山崩，所以想搵人幫佢諗個投資組合，最緊要穩陣兼唔怕臨老過唔到世。
投資可免坐食山崩
要穩陣，擺錢喺大銀行，風險應該最低，但擺100萬銀喺滙豐做定存，大概得3厘息，以平均通脹3%計，跑輸通脹，即係啲錢會越嚟越唔見使。其實一啲穩陣嘅投資都可以有5厘回報，所以要退休生活安枕無憂，無論如何都要投資。
講番呢位退休女士，如果佢想退休之後維持𠵱家嘅生活水平，即係每月有番萬五蚊使，假設佢活到90歲，即係大概有30年退休生活，咁佢有280萬銀拎去投資喺有5厘回報嘅投資產品上，就應該可以維持退休生活。
以呢位女士嘅退休金嚟計，佢應該唔使憂，問題係5厘回報嘅投資產品應該點揀？聽到同一個問題嘅朋友，提供咗唔同答案，有人話買基金、有人話買年金產品，睇開敏妮呢個欄嘅朋友，應該知道敏妮聽到呢啲答案會有乜反應。
收股息博跑贏通脹
敏妮唔抗拒人投資基金，只係買基金要畀管理費、認購費，反正退休生活冇乜世藝，投資毋須假手於人，不過，就有朋友話：「唔係個個都識投資，搵專業基金經理幫手，比較穩陣。」敏妮都好同意佢呢句說話，但專業嘅基金經理係咪百分百穩陣敏妮都有保留，所以有人提出，唔好淨係搵一個投資顧問幫你管理財富，將財富分開幾份，由唔同嘅投資顧問負責，每年檢討篩選換人。
不過，呢個世界冇免費午餐，請人幫你投資，當然要畀錢，雖然話好嘅投資顧問一定會幫你搵番有凸，但除非你筆財富真係好多，如果得雞碎咁多，仲要分幾份，淨係畀顧問費都冇咗截。其實，簡單就是美，點解要令自己嘅portfolio咁複雜，敏妮嘅投資組合除咗自住嗰層樓，醫療同人壽保險，就只有現金同股票。
好多人都知敏妮之前由月供滙豐（005）轉咗月供港交所（388），雖然曾經因為滙豐管理層方針同以前嘅有分別，考慮過賣咗滙豐，但後尾都保留落嚟，因為揸住佢嚟收息，仍然相當穩陣，𠵱家有4.4厘息。另外，可以考慮趁人人沽貨時，買番啲中電（002）同港燈（006）長揸收息，分別有4.658厘同4.713厘息，如果通脹3%，都可以跑贏通脹，當然你會話：「買晒股票好高風險，如果個市跌咪好牙煙！」
的確，世事冇絕對，但係如果連滙豐都出事嘅時候，其他投資都好難倖免，真係驚，頂多咪喺投資組合裏面加多嚿實物黃金，咁應該相當穩陣喇啩。
http://manlitalk.com/blogs/