秋意正濃，係時候開篷。揸開篷車，一係開到盡享受陽光凉風吹送，一係閂埋個篷，黑晒，冇中間位。須知道香港地有幾細，呢一刻你仲喺海邊被比堅尼包圍，3分鐘後你隔籬已經有架雙層巴士，樓上班麻甩佬仲指指點點高炒你條女，再過5分鐘仲要鬧市停燈位，有班自由行路過再指指點點。
既然唔會長時間開篷，閂埋後感覺同樣要照顧，玻璃硬篷頂，繼續靜靜哋享受陽光，延續跟大自然開Party嘅心情。
文：嘴嚼爺
攝影：陳偉強
Model：Maggie
22秒兩個世界
日產MicraC+C，一個C代表Coupe，另一個係Convertible，咁嘅格局，之前有架標致206CC。不過好多車開篷後係好型好舒服，但係一關上個篷頂，又頂頭又侷促，Micra最叻就係有一個玻璃硬頂，即係開篷就一望無際，關埋個篷向上望都只係好似戴咗太陽眼鏡隔一隔，隔住93%紫外線，兼唔會吹亂個頭。
對於屋企冇長備幾架車襯吓衫嘅人，呢部開篷座駕返工可以做腳車，放假又可以搵吓QualityofLife。一個掣，22秒，兩個世界各取所需，都幾啱要實際又要享受嘅香港人。
可愛定位
第一眼，看着Micra慢慢駛來，未見車尾感覺和同廠March冇分別，一樣Cutie。來到面前看側面，格局真如206CC，不過MicraC+C車身更圓渾更流線，關上篷頂後都唔會有怪雞感，的的骰骰就如一架簡單但可愛嘅細車仔，喺街度行都唔怕畀人話招搖。
對Micra有興趣，睇你都唔係車手，放心，Micra亦有小車特質，4.7米回旋半徑，即係泊車掉頭都好輕鬆。不過買得開篷車嘅你都應該耐不耐想扮有型，所以有得有失，請不要強求後座的舒適性。基本上後座只能應急，若要推前前座讓後座有可接受空間，你會發覺軚盤頂住你個肚腩。
慳家開篷
1,600c.c.直4引擎，前輪驅動，官方公佈最大馬力有110匹，日本車規格有數得計，請你唔好誤會佢係開篷跑車，不過已貼近普通四門房車規格，但車身較輕，變相馬力加大咗，隨時燈位起步都砌贏人。加上油價啱啱又加咗，呢架Micra耗油量只係13.2km/L，原來開篷車都唔一定係奢侈，由灣仔入赤柱，俾油就去毋須擔心每腳油都係錢，加上嬌小身軀轉彎靈活，令人揸得好舒服。不過回程時筆者懶有型繼續開篷，一落東廊結果換嚟烏煙瘴氣。唔再貪心，嗱嗱臨㩒番個關篷掣，享受天窗算數。
NissanMicraC+C
引擎：1,597c.c.直4
馬力：110匹/6,000rpm
扭力：15.6kgm/4,400rpm
傳動：前置引擎、前輪驅動
長闊高：3,820×1,670×1,445mm
車重：1,170kg
查詢：富利堡（23330747）
