胡錦濤喺十七大話「堅決反對外部勢力干預香港、澳門事務」，白鴿黨馬丁、單仲偕同人權監察總幹事羅沃啓去咗美國聽唔到，前日喺華盛頓同美國副國務卿內格羅蓬特（JohnD.Negroponte）會面近半小時，呢位官員係國務院第二號人物，而且同香港有淵源。
內格羅蓬特係資深外交官，耶魯大學畢業後入史丹福大學胡佛研究所進修，1960年投身外交界，翌年被調派到香港，擔任美國駐香港副領事，64年調職越南。之後平步青雲，先後擔任八個國家大使，又兩度出任美國常駐聯合國代表。05年參議院通過任命佢為國家情報局長，本年初官拜副國務卿。
馬丁同內格羅蓬特會面後話對方幾熟悉香港情況，除咗早年喺香港做官外，回歸後亦不時到訪，最令佢詫異係內格羅蓬特仲記得幾句簡單廣東話，一見到馬丁就問佢「食咗飯未呀？」又用廣東話同佢哋打招呼，「你好嗎？」有共同語言，呢次會面傾得甚為投契。
講起食飯，單仲偕此行就冇啖好食，因為佢忙於做「新聞統籌專員」，越洋傳送相片、新聞稿畀香港傳媒，要馬丁買漢堡包畀佢醫肚。