咖啡係唔少人「吊命」神仙水，八方嘆杯咖啡先開工都零舍醒神，𠵱家咖啡店成行成市，high嘅可以去Cova，Starbucks就總有一間喺左近最就腳，而茶餐廳咖啡勝在香濃，不過講到香港最出名飲咖啡嘅地方，梗係ICAC啦。八方冇機會品嚐，唔少名人就嘆過喇。
香港地老字號買少見少，民園麵家摺埋，泰昌被迫遷，詠藜園要上樓，呢間充滿港人集體回憶嘅飲咖啡老舖都走唔甩，個幾月後就要講拜拜，搬去北角渣華道303號新總部。廉署1974年成立，執行處78年搬到中環美利道停車場大廈，呢個困過唔少老虎、大鱷嘅office，原來由停車場改建而成，初時諗住屈就吓用住先，點知一用就29年。
三角形木枱套料
正當人家對被請番廉署飲咖啡多謝夾盛惠，對廉署最深印象應該係押解疑犯時，記者蜂擁而上影相嘅墟冚場面。廉署執行處署理首席調查主任林健明係過來人，佢話最難忘係藝人謝霆鋒喺廉署接受問話時，記者唔單止迫爆執行處樓下，甚至連每層停車場都有傳媒把守，十分大陣仗，不過呢種場面將成絕響，因為新總部有獨立停車場，保安好嚴密，記者只能夠喺出入口舉機。
林Sir喺美利道返工21年，要搬走好似有啲唔捨得，事關一枱一凳用開有感情。佢同八方講，有時查案最好嘅工具，未必係高科技器材，而係一張三角形木枱。八方親手摸過驗過，呢張枱真係一張普通木枱，唔係《國產零零漆》嗰種「攞你命3000」超級兇器，一㩒掣就見血封喉，咁有乜玄機呢？
據講呢張枱由英國專家設計，算係殖民地遺物之一，林Sir解釋，落口供時調查員、律師同接受調查人士各坐一邊，咁坐法最大好處係大家唔使面對面，好似打牌咁上下家對峙咁緊急，攞料時氣氛較為柔和，至於會面室嘅錄影設備同大塊反光鏡，作用係畀人睇清楚廉署人員問話時，冇喺枱底搞小動作。
呢張枱咁有用，林Sir話新總部會沿用，不過會有批新貨。舊嘅用咗十幾廿年，外表殘舊寒寒酸酸，的確唔係幾襯新裝修。為咗趕及12月8號新總部入伙開工大吉，廉署上下近日忙於執包袱搬竇，最緊要係將啲機密檔案安全轉移。新大樓樓高20層，除有拘留室、問話室同辦公室，仲有個練靶場，已有「飲咖啡」服務，舉報中心亦已開放，有料爆可上門。
