繼去年替主機護航嘅《Resistance人類沒落之日》之後，InsomniacGames喺相距不足一年又再捧出另一款PS3話題作品《Ratchet&Clank:ToolsofDestruction》，透過強大機能重新包裝。鑑於呢支實力小組不嬲都有諗頭，好少失威嚇親人，難怪本作會被挑選為完全中文化嘅重點力推對象之一，單睇受到欽點就知佢應該唔會太差啦。
文：陳福榮
千呼萬喚
在外地不嬲銷量與口碑都有番咁上下嘅《Ratchet&Clank》系列，第六集終於決定在PS3發揮所長。據知製作團隊嘅希望能夠活用呢部主機嘅強大功能，但又堅守住維持充滿神秘感冒險色彩嘅方針，所以製作時間特別長。今集《ToolsofDestruction》主要講述佢哋踏足從未到過嘅全新銀河系，有古文明部落，又有未來到爆嘅機械化基地，而且更會圍繞兩名主角嘅身世來講古仔，例如跟班Clank有種生命體只有佢先睇到，咁玩起來就唔使側重晒去Ratchet嗰度，都算係一條好橋。
科幻原始夾雜
由於被敵方大壞蛋睇中成為被殲滅對象，Ratchet於是再次發揮其過人正義感，去從未涉足過銀河系嘅多個不同世界冒險，為咗唔想祖家被消滅，主角惟有先發制人主動出擊。遊戲系統與表達手法都幾似當年GC嘅動作版《StarFox》，主角個樣相似，版圖亦係夾雜住科幻城市同原始大草原，兩者又巧合到同樣有打到去宇宙嘅星際空戰，難道本作係想向火狐前輩大玩致敬？
巨大波士打到開花
機種已由唔算好勁嘅PS2躍身至標榜高清嘅PS3，因此出現巨大角色亦變得好順理成章，今集《R&C》唔止有描繪得幾細緻吓嘅嘍囉，仲有為數不少嘅巨大級頭目，郁吓手都打到主角開花，有精采音效襯托，臨場感真係前所未有咁正斗。超過廿種嘅不同特性武器與附助型道具，可以透過提升等級來強化性能。 Game入面又有各種幾有心思嘅小遊戲，至啱喜歡儲嘢兼挑戰難度嘅老牌玩家。
亞洲版中英文兼備
之前SCEH已經為《Warhawk》、《Lair》同《HeavenlySword》呢三隻可作中英文顯示嘅宣傳焦點不停造勢。踏入11月就輪到另外三款聲勢更勁嘅排住隊來，包括今日講緊嘅《R&C》、堪稱「男版盜墓者」嘅《Uncharted:Drake'sFortune》同埋「真人版遊戲王」《EyeofJudgment第一章》。製作水準同流暢程度各方面都贏晒咁滯，所以先俾廠方放在11、12月銷售黃金檔期出。行版有得睇中英文，價錢肯定跑贏水貨，唔考慮媖亂咁買肯定係你蝕底。
機種：PS3
廠商：SCE
類型：ACT
人數：1人
日期：11月1日
價格：約$380
