立法會復會鬧出流會笑話，小市民即刻扁晒嘴大鬧議員：「仲好意思要求加人工？」有市民反應更加激烈，喺網上發起廢票運動。「你哋對香港政黨有咩感覺？我就覺得好厭倦啦，所以我決定發起投廢票運動，請多多支持！」
呢位網民狂抦議員尸位素餐，毫無建樹。「我哋應該對這些只為自己爭取政治利益，大搞黨爭嘅政客說不！」佢建議選民喺區議會選舉投票時投廢票，以示對政黨爭拗反感；有人話與其行去票站投廢票，不如集體取消唔做選民，一於當政客透明。其他地方選舉前，都有人有類似建議，然而成效麻麻，八方認為毋須咁極端，正所謂有得揀先至係老闆，冇理由唔做老闆，寧願任人魚肉㗎，係咪？