對港人嚟講，今日《新車A-Z》嘅KforKIA可能冇乜Feel，不過呢隻韓國品牌車仔一向以喪平取勝，尤其當中嘅Morning車系，4個位、有揭背、摺起後座加大尾廂、前側氣袋、1,000c.c.勁慳油……等，成個套餐揸住7皮嘢就玩到，就算月供都只係千零蚊，簡簡單單無壓力，新牌仔見到真係會講聲：「GoodMorning！」
文：嘴嚼爺
攝影：陳偉強
模特兒：Joanne
新牌仔恩物
兩年前，我試過車價唔使7萬嘅棍波版Morning，感覺係：「好彩係手波，都叫有啲力水。」但冇得拗嘅係車內陳設簡單，當時我好有信心佢可以取代大發仔成為新牌仔恩物。
車價平，總有理由。今日再試自動波版Morning，Delux版配自動波，車價已接近8萬蚊，依然平價依然頂爛市，性能設備，應該早已沒期待。既然預咗唔夠力，所以去飛鵝山影相都唔敢上咁高，免得阻住條單程路。
上斜有力兼慳油
由歐化傢俬隔籬嘅起亞陳列室出發，大力關門嗰下帶嚟驚喜，竟然冇就散就散嘅兒戲感覺，比想像中實淨。上橋落機隧，嘩！真係唔掂，內櫳點可能嘈成咁？到出隧道Cut線輕輕轉頭一瞄，噢，Sorry！原來後座窗口未關，怪錯咗佢，即㩒門邊電掣關窗，成個世界清靜晒。
去到飛鵝花園位置上斜路，斗膽踩大油門，有反應喎！雖然隔籬位Model唔夠一百磅，但載住兩個人喺短短斜路都加速到50km/h，算係咁囉。不過最恐怖嘅，係試完車、影完相還車，我驚覺支油針好似冇郁過一樣，17km/L耗油量果然名不虛傳！
普通的優點
外形，好普通。但係普通都可以係優點，因為筆者覺得Morning比起掃把佬R2，最優勝之處反而係普通！只會用8萬蚊買車嘅，可以係鍾意浮誇嘅新牌仔，但更有可能係只求有架「腳車」嘅實際成熟人，所以四平八穩嘅外形都有捧場客，況且新車已經加裝霧燈、後座頭枕等裝備，叫做四四正正。
設備方面，將價就貨一定會，但應有嘅佢都有，好過加嚿桃木收多你幾千吖。不過首先顧住自己條命仔，所以前座都有前、側各兩個氣袋，仲貼近歐洲車規格，可以關掉乘客位氣袋，確保加上兒童座椅後免生危險。而揭背車必備嘅放平後座加大尾廂設計，亦的確實用，加上中控台外形絕對見得吓人，遊山玩水返工見人都足夠有餘喇。
a.車頭都係簡簡單單，難得車仔唔算太Cutie，應該吸引到想平平哋買新車嘅成熟客。
b.嗱，唔係呃你，駕駛席中控台真係見得吓人，貴過佢但醜過佢嘅大有車在。
c.支波棍都唔太膠，前面仲有兩個杯架，求實用嘅車主應該滿意有突。
d.後座比較窄，如果前座有高人，後座就要屈就吓喇，仲要坐3個人？冇嘢嘅，熱鬧啲啫。
e.直4引擎唔算震唔算嘈，都係細車格局穩穩陣陣。
f.頭燈角度調校及霧燈燈掣都設喺中控台，幾年前6萬幾嗰部冇㗎。
g.點煙器旁有個兜仔，電話叉電最方便，啲線唔會四圍飛。
h.就係為咗影呢張動感相，令我來回斜路三次，講真，力水係比預期中好嘅。
i.後座可全幅放平或以6/4比放平，要載貨又要載客？Call雞記啦，咪揸車喇！
KIAMorning規格
引擎：1,086c.c.直4
馬力：65ps/5,500rpm
扭力：9.9kgm/2,800rpm
傳動：4前速自動波，前輪驅動
尺碼：3,495×1,595×1,480mm
車輛提供：KIAMotors（27609933）
起亞電單車
港人可能對今日嘅起亞唔多熟悉，其實佢前身係KyungsungIndustrialCo.Ltd，於1944年成立，而於52年，生產嘅第一架車並非汽車而係單車。而掛正起亞品牌名嘅，就係57年生產嘅電單車，其後起亞慢慢再進化研究，由生產3輪車、農夫車等汽車到今日有齊SUV、房車、7人車等，車種唔算少。
現代一家親
唔好話我大驚小怪，原來真係幾多人唔知起亞同現代兩大韓國汽車品牌，已經握手言和，唔再係死對頭而成為好拍檔。99年起亞已經歸於現代旗下，而喺韓國，兩品牌更共用同一座大廈作總部。
偽裝成最佳防盜
呢個曾經喺網上流傳嘅KIA歐洲版Spectra廣告，最搞笑係車主因為車價夠抵仲有10年保養，所以珍而重之用一個扮舊車嘅車冚笠住架車，驚人睇到係新車順手牽羊手尾長。不過咁，其實KIA汽車出名抵買，呢個方法似乎啱拉利林寶用多啲。
http://hk.video.yahoo.com/video/video.html?id=329704
