太子榮智健旗下嘅大昌行（1828）周三掛牌，股價表現令好多散戶網友大失所望，一開市就跌穿5.88個招股價，及後先至反彈，一度曾升過6蚊，但冇耐又跌番落去。
唔少借孖展入貨嘅散戶都損手，Smartfrankie好勞氣話：「我借孖展抽60萬股，中咗萬六股，每股平均成本價要成6.2蚊，家陣以5.95銀沽出，榮總真係好好人囉，咁就令到我捐咗4000幾銀出嚟。」
Kimpo亦話：「唔係吓嘩，第一日上市就搞成咁，升多少少都好吖！」Lilys就話：「今朝睇電視，大昌行個主席許應斌仲笑笑口話今日嘅股票表現幾好，都好滿意。」一開市就跌破招股價，咁都話好，唔怪得散戶咁㷫。
抽唔中 避過一劫
Royrac2就懶得戚，「好彩抽唔中，避咗一劫，應該快啲走去還神。」Larrytsang616話：「股票實有升有跌㗎啦，怪人都冇用，要自己檢討吓，究竟出發點係投資定投機。」
Fwho更認為：「投資應該學吓股神畢菲特咁，冇3年以上業績睇嘅公司，一律唔買，信人買股又唔做功課，輸咗錢冇得怨，惟有認命。」
大昌行周四收報5.88元，叫做守住招股價啦。