肥姐沈殿霞大前日出院，噚日佢又現身瑪麗醫院，不過大家唔使擔心，肥姐唔單止精神唔錯，講嘢仲中氣十足，佢入院只係覆診檢查身體，所以逗留兩個半鐘後，已經即刻出院，返九龍塘寓所休息養病。
噚日朝早9點幾，肥姐由女兒鄭欣宜、胞姐同傭人等陪同下踏出家門，由於天氣開始轉凉，肥姐都圍番條頸巾，當時在場有記者同佢打招呼，肥姐唔知幾好中氣，問記者係邊間報館，跟住司機即刻將一張膠凳仔放喺地下，畀佢做腳踏，再由女伴攙扶佢上車，尾隨嘅欣宜就戴住眼鏡、隨意着件開胸衫，同記者講早晨後就上車，陪媽咪去醫院覆診。
坐輪椅離開
直至中午12點鐘左右，肥姐做完檢查，就由醫院保安護航下坐輪椅離開，欣宜都好乖女，全程照顧媽咪。由於患有肝腫瘤、膽管癌同糖尿病嘅肥姐手腳有啲腫脹同發黑，噚日佢着住密頭鞋，又少露手指，雖然未知佢嘅病況進展，但見到肥姐精神番，相信身邊親友都好安慰。
肥姐返屋企後，相隔幾個鐘又出街，喺下晝5點，陳淑芬坐保母車到肥姐屋企，接佢去太子道西一幢大廈，但架車拉晒簾兼直落停車場，到夜晚7點，陳淑芬同張徹太太至送肥姐返屋企。
